Ternan aftur í sigling

Teir seinastu dagarnar hevur Ternan verið til árligt eftirlit á Klaksvíkar Sleipistøð, og skipið fer aftur í sigling í morgin.

Arbeiðið upp á Ternuna verður liðugt í dag, og siglir Ternan aftur á nólsoyarleiðini frá í morgin og til tann 23. apríl, tá hon fer í sigling á Sandoyarleiðini, meðan Teistin er á beding. Tað skrivar Strandferðslan á heimasíðu síni.

 

Strandferðslan bjóðar vanliga slík arbeiði út, og hevði Klaksvíkar Sleipistøð lægsta boðið uppá árliga viðlíkhaldsarbeiðið upp á Ternuna í ár. Arbeiðið hevur m.a. snúð seg um annan høvuðsmotorin, botnvintilar, málingaarbeiði og ymiskt annað. Nakað av arbeiðinum hevur verið gjørt, meðan skipið hevur ligið við kai, men hevur Ternan eisini verið upp á betingini, sum kann hava størri skip uppi enn Ternuna. 

 

Av Klaksvíkar Sleipistøð frættist eisini, at teir skulu saman við øðrum gera eitt størri umvælingararbeiði á nýggja Sildberan. Eisini fegnast teir stórliga um nýggja havnalagið frá Bedingskaiini til Kósakaiina, sum júst er tikið í nýtslu. Hetta lættir nógv um og ger alt bæði lættari og arbeiðsligari, siga tey á Klaksvíkar Sleipistøð.