Dannebrog blóðdálkað við hvalablóði

Ikki bert tað føroyska flaggið, men eisini tað danska er blóðdálkað við hvalablóði. Tað sigur Paul Watson, leiðari í Sea Shepherd

Ikki bert tað føroyska flaggið, men eisini tað danska er blóðdálkað við hvalablóði. Tað sigur Paul Watson, leiðari í Sea Shepherd.

 

Paul Watson sipar til, at Danmark javnt og samt heldur uppá, at spurningurin um grindadráp er eitt føroyskt mál, sum danska stjórnin ikki blandar seg uppí.

 

– Men grindadráp er brot á ES reglur. Hóast Danmark heldur uppá, at Føroyar eru uttan fyri ES, so kunnu Føroyar varðveitta høga livistøðið, júst tí at Føroyar verða stuðlaðar fíggjarliga úr Danmark, sigur Paul Watson.

 

Hann sigur víðari, at tey hava prótv fyri, at Danmark stuðlar grindadrápi og soleiðis er partur av grindadrápi – og harvið brýtur Danmark ES-reglur. Prógvini hjá Paul Watson eru, at danski flotin nú hevur blandað seg upp í herferðina hjá Sea Shepherd í Føroyum.

 

– Danmark roynir at ræða umboðini hjá Sea Shepherd í Føroyum við at seta inn bátar hjá flotanum, sum hava vundið bæði danska og føroyska flaggið á stong, sigur Paul Watson.

 

Sambært Paul Watson, so hevur Sea Shepherd sum mál at trýsta ES til at leggja uppí og steðga grindadrápi í Føroyum – ella sum Paul Watson kallar Føroyar: »Danska protektoratið Føroyar«.

 

– Líkamikið hvat danska stjórnin sigur, so stuðlar hon grindadrápi í Føroyum við at verja grindadreparar móti herferðini hjá Sea Shepherd, sigur Paul Watson.