Tað eru 83 ár síðani Sjálvstýrisflokkurin seinast hevði umboð úr Suðuroy. Nú ætlar Kristin Michelsen at royna seg sum sjálvstýrismann

Eingin sjálvstýrismaður síðani Edward Mitens

Vit skulu 83 ár aftur í tíðina fyri at finna seinasta sjálvstýristingmann, sum hevur umboðað Suðuroynna á Føroya Løgtingi. Nú er Kristin Michelsen vorðin sjálvstýrismaður, og hann skal royna at lyfta arvin eftir Edward Mitens frá 1936

Tað eru 83 ár síðani Sjálvstýrisflokkurin seinast hevði umboð úr Suðuroy. Nú ætlar Kristin Michelsen at royna seg sum sjálvstýrismann

Á løgtingsvalinum 28. januar í 1936 var Edward Mitens seinast ferð valdur á ting fyri Suðuroyar valdømi. Tá fekk Sjálvstýrisflokkurin 251 atkvøður í Suðuroynni og ein tingmann valdan í valdøminum.

Edward Mitens varð fyrstu ferð valdur á ting á løgtingsvalinum í 1916. Tá var hann sjálvur annar tingmaður fyri Sjálvstýrisflokkin í Suðuroy.

Arvurin hjá Kristini Michelsen kann tí verða tungur at lyfta, um hann skal veljast á ting fyri Sjálvstýrisflokkin. Á seinasta løgtingsvali fekk Kristin Michelsen 302 atkvøður á javnaðarlistanum. Tær flestu fekk hann sum vera man á Tvøroyri, har hann fekk 228 atkvøður. Av teimum 302 atkvøðunum vóru bara 23 atkvøður norðanfjørðs.

Floksformaðurin hjá nýggja sjálvstýrismanninum á Tvøroyri, Jógvan Skorheim, varð valdur á ting seinast við 389 atkvøðum, 87 fleiri enn Kristin Michelsen fekk.

Á seinasta løgtingsvali var tað ein annar útblakaður javnaðarmaður, sum stillaði upp fyri annan flokk. Tað var Gerhard Lognberg í Skopun, sum stillaði upp fyri Sambandsflokkin. Tann arvurin var eisini tungur at lyfta, tí enn hevur eingin sambandsmaður umboðað Sandoynna á tingi.

Spurningurin er so, um tað fer at eydnast Kristini Michelsen at gera Edwardi Mitens bragdið eftir.

Tað eru 83 ár síðani Sjálvstýrisflokkurin seinast hevði umboð úr Suðuroy. Nú ætlar Kristin Michelsen at royna seg sum sjálvstýrismann