K. O. Viderø í Roynhøllini

Mynd: Visit Suðuroy

Mynd: Visit Suðuroy

23. mars verður Roynhøllin í Hvalba karmur um ein fyrilestur um ein av gomlu prestunum í bygdini. Tað er Bergur Djurhuus Hansen, ið fer at halda fyrilestur um K.O. Viderø og ritverk hansara.


K.O. Viderø (1906-1991) er kendur millum manna í Føroyum. Hann var prestur, bíbliutýðari og rithøvundur. Hann ferðaðist ein stóran part av lívinum og var tiltikin góður frásøgumaður.


Fyrilesturin verður um lív og ritverk hansara. Eitt evni í fyrilestrinum verður tann tvídrátturin, sum Viderø lýsti í sínum mongu ferðafrásagnum og greinum, millum at vilja hoyra til í Føroyum og kortini ikki støðast í Føroyum.


Í alt eru komnar út 13 bøkur eftir Viderø: 4 ferðafrásagnir, 3 bøkur við yrkingum og hugleiðingum og 7 bøkur við søgum úr føroyskum bygdum. Harumframt eru einstakar týðingar eftir Viderø komnar út. Frá 1968 og til hann fór frá fyri aldur í 1977, var Viderø prestur í Suðuroyar norðara prestagjaldi og búði í prestagarðinum í Leirum í Hvalba.


Bergur Djurhuus Hansen er ph.d. og adjunktur í bókmentum á Føroyamálsdeildini á Fróðskaparsetri Føroya. Hann gav í fjør út bókina “Er heima til?” um ferðafrásagnirnar hjá K.O. Viderø.


Eftir fyrilesturin verður kaffi, og Hvalbiar sóknar fornminnafelag fer at greiða frá sínum ætlanum.