Akraberg landar í Fuglafirði

Veiðan er umleið 900 tons av skráskornum toski, sum verður seldur á altjóða marknaðinum

Í gjár kom Akraberg á Fuglafjørð. Teir fóru avstað 18. november, og hava roynt í russiskum sjógvi.

Talan var umskjótan og góðan túr. Veiðan er umleið 900 tons av kruvdum og avhøvdaðum toski, sum teir í dag fóru undir at landa.

Skiparin henda túrin var Erland Olsen, ættaður úr Rituvík. Manningin taldi 27 menn. Akraberg fer avstað aftur eftir ársskiftið, tá ið teir eru lidnir at landa og at gera skipið út av nýggjum. Eyðun á Bergi í Klaksvík verður skipari næsta túr, tá ið teir eisini fara at royna í russiskum sjógvi.

Meðan føroyska veiðan eystanfyri áður varð skorin til flak, sum fyri tað mesta varð selt á bretska marknaðinum, har talan var um fastar sáttmálar, so er tað øðrvísi nú á tann hátt, at fiskurin bara verður avhøvdaður og kruvdur og seldur á altjóða marknaðinum.

-Talan er um nýggjar tíðir og nýggjar umstøður. Hetta er fyrsta ferðin, at veiðan hjá okkum verður framleidd og seld á henda hátt, sigur Anfinn Olsen í Fuglafirði, sum er reiðari á Akrabergi.

Myndina tók Eyðun á Lakjuni í Fuglafirði seinnapartin ídag.