Eru nú givnir at leita

Teir eru nú givnir at leita eftir abbadóttir Robert F. Kennedy og átta ára gamla soni hennara, Gideon.

Maeve Kennedy í ljósareyðum kjóla. Sonurin Gideon er nummar tvey í røðini frá høgru.

Maeve Kennedy í ljósareyðum kjóla. Sonurin Gideon er nummar tvey í røðini frá høgru.

 

Leitingin eftir abbadóttir Robert F. Kennedy og soni hennara, átta ára gamla Gideon, er nú steðgað. Tað var hósdagin, at tey bæði fóru í ein lítlan bát - eina kano - tá tey skuldi fara eftir einum bólti, sum tey høvdu mist á sjógv.

CNN sigur, at leitingin eftir teimum báðum varð steðgað, eftir at leitað hevði verið í 26 tímar. Syrgiliga hendingin fór fram í Chesapeake Bay, nær við Annapolis í Maryland.

Longu fríggjadagin, áðrenn leitingin helt upp at, varð hildið, at móðir og sonur vóru deyð á sjónum, tí ein bátur varð funnin, ið líktist bátinum, sum tey bæði høvdu verið í. 

Amerikanskir miðlar skriva, at veðrið var ruskut, tá tey fóru í bátin, og hetta er helst orsøkin til, at móðir og sonur ikki vunnu upp land aftur.

- Hetta er ein ógvuliga syrgilig hending, og tað var trupult at taka avgerð um at gevast at leita, sigur varaleiðarin á tilbúgvingartænastuni í økinum, Matthew Fine, við CNN.

Mamman, Meave Kennedy McKean, var abbadóttir Robert F. Kennedy, sum varð skotin í 1968, meðan hann var forsetavalevni.

Beiggi Robert F. Kennedy, John F. Kennedy, varð dripin í Dallas í 1963, meðan hann var amerikanskur forseti.

Kennedy-familjan hevur gjøgnum tíðirnar verið hart rakt av ymiskum vanlukkum, og her eru nakrar av hendingunum, sum hava rakt familjuna:

* 1963: Forsetin, John F. Kennedy, verður skotin í Dallas

* 1968: Robert F. Kennedy, forsetavalevni, verður skotin í Kalifornia.

* 1984: Sonur Robert F. Kennedy - David - doyr at yvirdosis.

1997: Sonur Robert F. Kennedy - Michael - doyr í einari skíðvanlukku.

* 1999: Sonur, John F. Kennedy - John F. Kennedy Jr. og kona hansara - doyggja í einari flogvanlukku.

* 2019: Abbadóttir Robert F. Kennedy, Saoirse Kennedy Hill, doyr av yvirdosis.

* 2020: Abbadóttir Robert F. Kennedy - Maeve Kennedy Townsend McKean og sonur hennara - eru saknað eftir vanlukku í báti.


 

 

Maeve Kennedy í ljósareyðum kjóla. Sonurin Gideon er nummar tvey í røðini frá høgru.