Føroyingar eiga at brúka ósemjuna ímillum USA og Kina

Ósemjan setir okkum í eina sterka støðu, og tað eiga vit at brúka, heldur løgtingskvinna

 

 

Landsstýrið eigur at tosa við allar flokkarnar, so at vit kunnu standa saman ímóti USA og Kina, heldur løgtingskvinna

Landsstýrið eigur at tosa við allar flokkarnar, so at vit kunnu standa saman ímóti USA og Kina, heldur løgtingskvinna

Tað er ikki av ongum, at bæði USA og Kina royna at leggja trýst á føroyingar, nú vit ætla at menna 5G-internetið í Føroyum.

Tað heldur Kristina Háfoss, tingkvinna fyri Tjóðveldi.

Vit hava tikið samstarv upp við Huawei og tað vilja kinesarar hava okkum at halda fram við, men hinvegin leggur USA trýst á okkum fyri at fáa okkum at velja ein samstarvsfelaga úr Evropa ístaðin.

Tað er tískil ikki uttan orsøk, at myndugleikarnir í Kina, hevur havt fund við landsstýrið í Føroyum og  tað er heldur ikki uttan orsøk, at myndugleikarnir í USA ikki vilja hava okkum at samstarva við kinesiska Huawei, heldur hon.

Men hon heldur eisini, at nettupp hetta gevur landsstýrinum eina søguliga góða samráðingarstøðu-

Og tað er ikki bara í sambandi við 5G-netið, at hetta setir okkum í eina sterka støðu, men hetta setir okkum eisini í eina søguliga sterka samráðingarstøðu í sambandi við royndirnar at fáa okkum føroyingum betri umboðan á uttanríkispolitiska økinum.

Hon sigur, at vilja vit sleppa okkum úr uttanríkispolitisku spennitroyggjuni, ið avmarkar okkara møguleikar úti í heimi, hevur møguleikin ikki verið betri, enn hann er nú.

Tí heldur hon, at nú eigur landsstýrið at ráðføra seg við allar flokkar á Løgtingi, og við Uttanlandsnevndina, soleiðis at vit øll standa saman um samráðingarnar, sum standa fyri framman í hesum máli.

Hon sigur, at hetta er eitt mál, ið snýr seg bæði um uttanríkispolitikk, handilspolitikk og trygdar- og verjupolitikk - umframt okkara komandi 5G-net.

Tað eina stríðið snýr seg sostatt um, hvør skal hava ræðið á talgilda undirstøðukervinum í Føroyum, sigur hon. Men samstundis er stríðið um Arktik hart, og USA leggur áhaldandi trýst á Danmark fyri at styrkja verjuna í Arktis - sum Føroyar eisini eru fevndar av.

Tað er ikki av ongum, at fleiri umboð, ovarliga í amerikansku stjórnini, hava vitjað í Føroyum seinastu árini og at herðnaðarskip kemur til Føroya. Og tað er heldur ikki av ongum, at vit eisini fáa fleiri vitjanir upp á stutta tíð- bæði frá amerikonsku sendikvinnuni, frá donskum ráðharrum, kongshúsi og forsætisráðharra, heldur Kristina Háfoss.

Landsstýrið eigur at tosa við allar flokkarnar, so at vit kunnu standa saman ímóti USA og Kina, heldur løgtingskvinna