Til Føroyar at kunna læknar um heilivág við kannabis

– Tað verður eisini ein almennur fundur um evnið

Fyrst í apríl verður kunnandi fundur fyri læknar í Føroyum um kannabis sum heilivág. Tað eru teir báðir, Ragnar Joensen og Arnfinn á Birtuni, sum skipa fyri, men tey, sum standa fyri kunningini eru umboð fyri felagsskapin cannabis Danmark, sum eisini koma til Føroyar til endamálið.

 

Cannabis Danmark er ein áhugafelagsskapur, har eitt av endamálinum er at ráðgeva og kunna um kannabis, sum heilivág og tað gera tey bæði við politikarar, myndugleikar, læknar, og onnur. Í almenninginum eru best kendi nevndarlimurin í felagsskapinum, Ritt Bjerregaard, fyrrverandi politikari, og sjónleikarin, rithøvundurin og fyrilestrarhaldarin, Søs Egelind.

 

 

Ein av teimum sjúklingum, sum fegin vil hava lættari atgongd til heilivág við cannabis, er Gunnvá Tróndardóttir Joensen í Klaksvík. Les meiri um tað her: Sklerosusjúklingur: Eg eri troytt av av skula forklára

 

 

Spurningurin um at geva sjúklingum í Føroyum lættari atgongd til heilivág við Kannabis, hevur eisini verið stórt umrøðuevni í Føroyum. Í hesum sambandi legði Miðflokkurin eitt uppskot fyri Løgtingið um at gera tað lættari hjá sjúklingum við ávísum sjúkum at fáa heilivág við kannabis í, men tað varð felt.

 

 

Og tað fall áðurnevndu Gunnvá Tróndardóttir Joensen rættiliga fyri bróstið, tí hon segði: Tit vilja ikki sjúklingum alt tað besta

 

 

Og nú eru so stig tikin til at fáa umboð fyri Cannabis Danmark til Føroya at hava kunnandi fund fyri læknar um kannabis, og har eru allir læknar í landinum, bodnir við, men onnur heilsustarvsfólk, og politikarar eru eisini vælkomin við, sigur Arnfinn á Birtuni. Tað verður annan apríl og samstundis verður eisini ein almennur fundur um evnið, og tað verður fyrst í apríl.

 

Hann sigur, at fremsta endamálið við er at gera tað lættari hjá sjúklingum við ávísum sjúkum at fáa viðgerð við kannavis. Fremsta endamálið er at fáa læknar at standa fyri viðgerðini við løggildum kannabis-heilivági ígjøgnum heilsuverkið.

 

Men eydnast tað ikki at fáa læknar at taka hetta til sín, er ein annar møguleiki at fáa serligar kannabis-viðgerarar, sum eisini skulu vera góðkendir, at viðgera sjúklingar við, akkurát sum hann sigur, at tey hava tað summastaðni í USA.