Liljan og Jan aktaðu ikki Dia Midjord

Hóast Dia Midjord kravdi, at ávís brot í sjónvarpssendingini um Jørgen Niclasen vórðu tikin úr sendingini, so varð sendingin ikki broytt.

Jan Lamhauge, journalistur í Kringvarpinum, og Liljan Weihe, tíðindaleiðari í Kringvarpinum við redaktionellu ábyrgdini, aktaðu ikki boðini hjá kringvarpsstjóranum, sum kravdi, at ávís brot í sendingini um Jørgen Niclasen vórðu tikin úr sendingini.

 

Tað kom fram í Degi og Viku í kvøld. Eitt nú kravdi Dia Midjord, at brotið, har Jørgen Niclasen sang – sum var úr eini sending hjá Elisi Poulsen – varð tikið úr sendigini. Tað var, tá fleiri leiðandi starvsfólk í Kringvarpinum sóu endaligu sendingina, nakað áðrenn hon varð send, at stjórin kravdi broytingar. Men lurtað varð ikki eftir kringvarpsstjóranum.

 

Hetta er fyrstu ferð, at tað er komið fram, at ósemja hevur verið ímillum tey trý kringvarpsfólkini um herferðina ímóti Jørgeni Niclasen í Kringvarpinum.

 

Tað var hendan viðgerðin, sum førdi til, at Dia Midjord saman við teimum báðum starvsfólkunum í Kringvaprinum í gjár vórðu dømd fyri ærumeiðing.

 

Tey fýra dømdu skulu persónliga rinda yvir 50.000 krónur í part umframt egnar sakrføraraútreiðslur.

 

Enn er ikki greitt, hvørjar avleiðingar dómurin skal fáa fyri stjóran í Kringvarpinum og starvsfólkini. Í morgin verður fundur í kringvarpsstýrinum, sum varðar av Kringvarpinum og sum er tann stovnur, sum ger av, um Dia Midjord skal halda fram í starvinum ella møguliga sigast úr starvi vegna dómin.

 

Hóast Kringvarpið og hinir miðlarnir eru rættiliga ágangandi fyri at fáa viðmerkingar, tá aktuell mál eru fyri, so vilja hvørki Dia Midjord ella Liljan Weihe gera viðmerkingar til Kringvarpið um málið.

 

Tískil er heldur ikki greitt, um tey trý í Kringvarpinum taka við dóminum ella um tey kæra hann til Landsrættin.

 

Eftir fundin í kringvarpsstýrinum í morgin verður helst greitt, hvør lagnan hjá teimum trimum verður.