Gulløl frá Føroya Bjór skal av hillum í dag

Føroyska bryggjaríið hevur fingið freist til í dag at taka gullølið av hillunum í rúsdrekkasøluni í Íslandi. Eisini skal øll marknaðarføring og allur innflutningur av føroyska gull-ølinum til Íslands steðgast í dag

Føroyska bryggjaríið hevur fingið freist til í dag at taka gullølið av hillunum í rúsdrekkasøluni í Íslandi. Eisini skal øll marknaðarføring og allur innflutningur av føroyska gull-ølinum til Íslands steðgast í dag

 

So greið eru boðini frá íslendska bryggjarínum, Ølgeðrin, sum bryggjar ølið Egills Gull. Tað skrivar Sosialurin í dag.

 

Íslendska bryggjaríið sigur seg hava einkarrætt til navnið »gull« í Íslandi, hóast Føroya Bjór hevur bryggjað gull-øl í níggju ár longri enn íslendingar, og hóast føroyska gullølið hevur fingist til keyps í Íslandi í meira enn 20 ár.

 

Í hvassorðaðum brævi frá advokati hótti íslendska bryggjaríið við rattarsókn, sum Føroya Bjór ikki eftirlíkar krøvunum.

 

Í samrøðu við íslendska blaðið DV sigur stjórin í Ølgerðin, at hann als ikki leggur upp til kríggj ímóti Føroya Bjór, men bara hevur sent eina vinarliga áheitan til Føroya Bjór um at greiða málið.

 

Sosialurin hevur fingið innlit í brævið frá íslendska advokatinum. Har eru boðini púra greið:

 

– Steðgar Føroya Bjór ikki allari sølu og marknaðarføring í Íslandi í dag – og øllum innflutnigni til Íslands av føroyskum gull-øli, so hevur Andri Thor Guðmundsson, stjóri í Ølgerðini, ongan annan møguleika enn at fara til dómstólin at krevja sín rætt.