Heiðursløta og frumframførsla í Vágs kirkju sunnudagin

 

Fróur fer til verka hvør í sínum lag.
Sólareygað sterka føðir nýggjan dag.
Verndareingil vardi væl við vára vrá.
Guð oss sjálvur lærdi: trygg vit eru tá.

 

Sunnudagin fyllir ein kendur vágbingur, skaldið Niels Petur Nolsøe, 75 ár.

 

NePtuN hevur í mong ár ríkað okum við megnar yrkingum báði til gamans og álvara. Ein lítil partur er komin út í bók í tveimum yrkingasøvnum.

 

Í samband við føðingardagin verður skipað fyri eini almennari heiðursløtu í Vágs kirkju, har Kirkjukórið Ljómur undir leiðslu av Jóannes Nolsøe fer at syngja nakrar av kendastu sálmunum og sangunum hjá NePtuN.

 

Eisini fer Jóannes Nolsøe, at spæla nýskrivaða orgulverkið “Kirkjuljómur”, sum Sunleif Rasmussen skrivaði til 80 ára dagin hjá kirkjuni og kórinum í fjør.

Sjálvur sigur Sunleif Rasmussen um verkið:

-  Tað er Jóannes Nolsøe sum frumframførður mítt verk fyri urgu, ið nevnist "Kirkjuljómur". Verkið er ljómur til Vágs kirkju og kórið Ljómur! Eg gleði meg til hetta tiltakið.