Georg Stage á Vágsfirði

Skúlaskipið kemur til bryggju mánadag seinnapart.

Tað var ein heldur óvanlig sjón, ið møtti teimum, ið hugdu út á Vágsfjørð í dag. Umframt skip og bátar, ið hava við aling at gera, so sást eitt stórt seglskip. Eitt skip, ið meira minti um farna tíð, mótvegis hinum nýggjaru førunum. Skipið legði stilt við repaðum seglum úti á fjørðinum.

Talan er um danska skúlaskipið Georg Stage. Nógvir føroyingar hava verið næmingar umborð á skúlaskipinum, teirra millum eisini vágbingar, og skiparin hevur verið í samband við onkran teirra, og spurt seg fyri, hvat forvitnisligt er at uppliva á staðnum, tí ætlanin er at koma til bryggju mánadag seinnapart.

Sum skilst skulu næmingar ætlandi sleppa at vitja í Vági, og uppliva tað, ið staðurin hevur at bjóða.

Mynd; DS