Vit mugu skapa eftirspurningin

Kent Christensen, stjóri á Make Travel, sigur at tað bara eru føroyingar, sum kunnu skapa eina ferðavinnu í Føroyum.

Kent Christensen var í farnu viku við á Vestnorden Travel Mart fyri 17. ferð. Hann og konan, Maria Samson, hava júst byrjað eina nýggja ferðaskrivstovu, Make Travel, eftir at tey seldu teirra part av 62°N.

 

- Vestnorden Travel Mart ræður fyrst og fremst um at røkja sambandið við netverkið hjá okkum. Hóast Make Travel er ein nýggj skrivstova, so kenna vit sera nógv fólk her, og tað persónliga sambandið er nógv týdningarmiklari enn navnið á fyritøkuni, sigur Kent Christensen.

 

- Vit hava havt nógvar fundir her á stevnuni, eg vil meta eini 15 til 20 fundir, við keyparar úr londum so sum Suður-Korea, Russlandi, Danmark og Týsklandi, sigur hann.

 

Kent Christensen heldur, at føroyska ferðavinnan hevur ment seg nógv tey seinastu árini.

- Fyrr hava vit ikki duga serliga væl at menna lýsingararbeiði innan føroysku ferðavinnuna. Tað eru vit sjálvi, ið mugu skapa ein eftirspurning eftir ferðum til Føroya, men nú tykist vend vera komin í, heldur hann.

 

Kent Christensen heldur, at ein av høvuðsavbjóðingunum hjá ferðavinnuni í Føroyum, er at gerast fullt góðtikin sum ein vinna, bæði av politisku leiðsluni og av fólki annars.

- Føroyingar eru so vanir at hugsa um fiskivinnnu, sum einastu veruligu vinnu í Føroyum, men ferðavinnan hevur ment seg stak nógv seinastu árini, og ferðafólk leggja meiri og meiri pening eftir seg í Føroyum.

 

- Tó so, skal ferðavinnan fáa góðar umstøður, so er neyðugt at politisk undirtøka er fyri at stuðla henni. Guðrið Højgaard letur til at hava stóran politiskan tokka, ið er alneyðugt í tí starvinum, hon hevur. Vónandi verður tað allari ferðavinnuni at frama, sigur Kent Christensen, stjóri á Make Travel.