Ein roynd at skatta útlendskar eigarar

Nýggja tøkugjaldið er eitt amboð at skatta fyritøkur við útlendskum ognarskapi.

Hækkaða tøkugjaldið hjá CEF-samgonguni hevur fingið nógva umrøðu síðani, at landsstýrið kunngjørdi broytingina mánadagin.


Meiningarnar eru nógvar um hækkaða gjaldið, og serliga fólk innan vinnuni hava funnið hart at nýggja tí. Men sambært Eyðfinn Reyðberg, ið hevur drúgvar royndir úr føroyska fíggjarheiminum, metir, at talan er um eina roynd frá landsstýrinum at skatta útlendskan ognarskap í alivinnuni.


- Tá Aksel V. Johannesen, løgmaður, sigur, at man ynskir at skatta øðrvísi enn av vinningsbýtinum, so er tað tí, at hann veit, at 70 prosent av ognarskapinum í alivinnuni er útlendskur.


- Vit hava millum annað ein stóran aktør í føroyskari alivinnu, ið eitur Marine Harvest. Føroyar hava ein tvískattaavtalu við Norra, ið inniber, at Marine Harvest ikki noyðist at rinda skatt av vinningsbýtinum í Føroyum. So tá Marine Harvest rindaði sær sjálvum 123 milliónir krónur í vinningsbýti í 2013, so fekk landskassin einki inn í skatti.


- Um samanlíkna verður við føroysk viðurskiftir, so kann sigast, at um Atli Gregersen ynskir at rinda sær sjálvum vinningsbýti frá Luna, so má hann rinda 35 prosent í skatti, meðan Marine Harvest sleppur undan at rinda nakað.