Tíðarætlanin heldur ikki

Uppihaldstrappan í Vágsbotni verður ikki liðug. Orsøkin sigst vera manglandi tilfar.

Uppihaldstrappan í Vágsbotni, sum byrjað varð á seinast í apríl mánað, verður ikki klár til tiltakið Voxbotn, sum ætlanin annars var.

 

Hóast kommunan so seint sum 2. juni legði doyin á, at trappan fór at blíva liðug, so hava keldur hjá Miðlahúsinum váttað, at so verður ikki.

 

Andrias Berg byrjaði at gera trappuna seinast í apríl, og tó at væl gekk fyrstu tíðina, so tykist arbeiðið í stóran mun at hava steðgað upp seinastu vikurnar.

 

Hvørki Andrias Berg, arbeiðstakari, ella Mikael Viderø, tekniskur stjóri í Tórshavnar kommunu ella nakar annar í kommunuumsitingini, vilja váttað tíðindini fyri Miðlahúsinum, men sum skilst er orsøkin til seinkingina fyrst og fremst, at arbeiðstakarin ikki hevur fingið tað grót, sum skal til, fyri at gera arbeiðið liðugt.

 

Keldur hjá Miðlahúsinum siga, at tað vístu seg at vera nógv fleiri káplar undir vegnum niðan á Bryggjubakka og undir fríøkinum, har Perlan í síni tíð stóð, enn nakar hevði mett frammanundan, men at hetta tó ikki er tað, sum darvar arbeiðinum mest.

 

Sum skilst verður arbeiðið hvørki liðugt til Voxbotn, sum verður 27. juni, ella áðrenn ólavsøku, sum annars varð tíðin, tá alt arbeiðið á Bryggjubakka, bæði nýggja uppihaldstrappan, útbyggingin hjá Poul Hansen og nýggi vegurin niðan á Bryggjubakka, skuldi vera liðugt.

 

Enn er ikki greitt, hvørja ávirkan hetta fær á tónleikatiltakið Voxbotn.