Løgmaður gjørdi hattrick í Russlandi

Løgmaður megnaði tað, sum undangongumaður hansara í løgmanssessinum ikki megnaði, sigur Alfred Olsen.

Alfred Olsen, formaður í vinnunevnd Løgtingsins, fegnast um avrikið hjá Kaj Leo Holm Johannesen í Russlandi. Í eini handavending avrikaði hann tað, sum undangongumaður hansara í løgmanssessinum ongantíð megnaði.

 

- Ein fríhandilsavtala við Russland er eitt gamalt mál, sum loysingarsamgongan frá 1998 til 2004 arbeiddi við at gera, men har spurdist onki burturúr, skrivar Alfred Olsen.

 

- Men núverandi løgmaður Kaj Leo Holm Johannesen, sum hevur hetta málsøkið og ynskir úrslit, valdi at fara til Russland og taka hetta upp á fundi í Moskva við russisku myndugleikarnar, og sum endaði við, at nú verður farið ítøkiliga undir at fyrireika eina eina fríhandilsavtalu millum Føroyar og Russland, skrivar hann víðari.

 

Alfred Olsen rósar eisini løgmanni fyri at hava fingið váttan frá russiskum myndugleikum, at føroyskar fyritøkur ikki vera boykottaðar av Russlandi.

 

- Hetta ber ongan farra av misbrúki av støðuni millum Rusland og ES, men er ein natúrligur partur av at røkja okkara útflutningsmarknaðir, sigur Alfred Olsen, sum vísir á, at meðan útflutningurin hjá ES til Russlands er eitt promillu av teirra samlaða útflutningi, so tekur russiski marknaðurin ímóti 15% av føroyska útflutninginum. Eitt handilsbann móti Russlandi vildi sostatt havt nógv størri avleiðingar fyri Føroyar enn tað hevur fyri ES.

 

Alfred Olsen sigur, at tað júst var eitt handilsbann, ið noyddi føroyingar at leita sær út á russiska marknaðin, tað er handilsbannið, sum ES setti í verk móti Føroyum. Alfred Olsen skilir lítið av, at politisku mótstøðufólk løgmans, nú ynskja, at føroyska stjórnin skal standa lið um lið við teir, sum setti handilsbann í gildi í móti okkum, í einum nýggjum handilsbanni, móti Russlandi, sum varð okkara bjarging fyri einum lítlum ári síðani.

 

- Á ferð síni í Ruslandi megnaði Kaj Leo Holm Johannesen, løgmaður at gera hattrick til gagns fyri Føroyar, og tað føroyska vinnulívið. Fyri tað fyrsta at fáa eina fríhandilsavtalu, fyri tað næsta, at Føroyar ikki vera umfataðar av boykottinum og fyri tað triðja, at fáa føroyskar fyritøkur av reyða lista, skrivar Alfred Olsen.

 

- Tað eydnaðist, og rós skal hann hava fyri tað. So kunnu aðrir, sum ikki megnaðu at fáa eina fríhandilsavtalu o.a. í lag við Russland, bæði gráta og illa láta, tí tað broytir onki við tann veruleika, at løgmaður hevur gjørt eitt gott arbeiðið, skrivar Alfred Olsen at enda.