Lions ger klárt til ólavsøkuna

Tey, ið ætla at sýna fram listaverk á árligu ólavsøkuframsýningini hjá Lions í Müllers Pakkhúsi, hava enn nakrar dagar at boða frá luttøku.

Nú ber til at bjóða seg fram at sýna fram listaverk á árligu ólavsøkuframsýningini hjá Lions Club Tórshavn í Müllers Pakkhúsi

 

Í ár verður ólavsøkuframsýningin frá leygardegnum 27. juli til týsdagin 30. juli, og sum vanligt, miðar Lions Club Tórshavn eftir at hava eina stóra og fjølbroytta framsýning í Müllers Pakkhúsi.

 

Ofta hevur verið gravgangur eftir at sleppa við, og tí heldur Lions seg til leistin, sum hevur verið seinnu árini, at hvørt listafólk kann í mesta lagi hava trý verk við á framsýningini.

 

Freistin at boða frá luttøku á ólavsøkuframsýningini er mikudagin 24. juli, og tað kann gerast á www.facebook.com/lionstorshavn. Listaverkini, ið skulu sýnast fram, skulu latast inn í Müllers Pakkhúsi hósdagin 25. juli millum klokkan 16 og 18.

 

Sum vanligt, fer ágóðin av framsýningini óskerdur til eitt vælgerandi endamál ella felagsskap, og verður í næstum kunngjørt, hvør skal fáa ágóðan av ólavsøkuframsýningini 2019.