Lív Egilsdóttir Olsen forkvinna í SamFelagnum

Nevndin í SamFelagnum hevur skipað seg av nýggjum eftir aðalfundin.

Í nevndini sita nú Lív Egilsdóttir Olsen, forkvinna, Elsa Maria Hansen, Elisa Vang, Erla Weihe Johannesen, Uni Holm Johannesen og Ása Hammershaimb Christiansen.

Anna Sofía Lava, Marita Svartá og Rósa Egolm stillaðu ikki upp aftur.

SamFelagið varð stovnað í 2014 og hevur knapt 80 limir. Felagið hevur seinastu árini millum annað ment eitt alment savn við ritgerðum hjá føroyskum samfelagsfrøðingum, umframt eitt yvirlit yvir føroyskar samfelagsfrøðingar og teirra serøki. Alt er at finna á heimasíðuni hjá SamFelagnum, www.samfelagid.fo.

Endamálið hjá SamFelagnum er lýst soleiðis á heimasíðu felagsins:

»Inneftir skal felagið vera ein miðil til fakliga menning fyri einstaka limin og fyri samfelagsvísindi, sum yrkisgrein. Felagið er ein pallur fyri vitanardeiling og fakligum íkasti til og millum limir.

Úteftir skal felagið vera umboð fyri samfelagsvísindi í samfelagnum. M.a. við at kunna um samfelagsvísindaliga gransking og samfelagsvísindaligt arbeiði, styrkja ávirkanina frá samfelagsvísindaligum arbeiði og geva fakligt íkast til samfelagskjakið.«

Felagið miðar eftir at virka fyri fakligum íkasti til samfelagskjakið við at seta sjóneykuna á samfelagsfrøðingar og førleikar teirra, og styrkja ávirkanina av samfelagsvísindaligum arbeiði. Hetta verður millum annað gjørt við at skipa fyri tiltøkum um viðkomandi evni í samfelagnum, umframt at geva samfelagsfrøðingum orðið í almenna kjakinum. Í august 2019 skipaði nevndin fyri valfundi í Løkshøll, Runavík, við umboðum úr øllum flokkum, ið høvdu løgtingsvalevni 2019. Evnið var integrasjón í Føroyum við serligum denti á kvinnuligar tilflytarar. Í novembur hevði nevndin Samfelags-quiz við Gunnar Nolsøe í Blábar, bæði tiltøkini vóru væl vitjaði. Í 2020 hevur nevndararbeiði og virksemi hjá felagnum verið skert, orsaka av korona kreppuni, tí blivu fleiri tiltøk avlýst sum nevndin hevði lagt til rættis í vár.

Nógv spennandi er í væntu hjá nýggju nevndni, sum hevur ætlanir um at hava eitt stórt tiltak við føroyskum og útlenskum gestum í nærmastu framtíð. Eisini fer felagið at styrkja rødd samfelagsfrøðinganna í almenna rúminum.