Komin til landið

Brúgvin um Sandá skal eftir ætlan verða liðug í summar. Nú eru stálkonstruktiónirnar komnar til landið.

Við vestaru bryggju í Havn liggur fraktskipið Hohe Bank. Umborð eru stálkonstruktiónirnar til brúnna um Sandá, sum eru framleiddar í Pólandi. Um viðrar, so er ætlanin at fáa stálið upp við vestaru bryggju sum skjótast og so seinni at flyta tað út til Sandá. Hetta verður helst gjørt um náttina, boðar Tórshavnar kommuna frá í dag.

Heðin Mortensen upplýsir, at ætlanin er, at kranin hjá Mekanik skal lyfta stálkonstruktiónirnar í land og seta tær á ein blokkvogn hjá IR Lastbilum. Síðani verða konstruktiónirnar fluttar eftir J.C. Svabosgøtu.

 

Orsaka av at stálkonstruktiónirnar eru sera stórar, tær størstu níggju metrar breiðar og 14 metrar langar, verður onkustaðni, serliga á Velbastaðsvegnum, neyðugt at flyta bussskýli, skelti og pelar, meðan konstruktiónirnar verða fluttar. Hetta arbeiði fer tí í gongd í næstum. Væntandi verða konstruktiónirnar fluttar um náttina. Tað er avmarkað pláss á byggiøkinum við Sandá, og tí er neyvan sannlíkt, at allar konstruktiónirnar verða fluttar beinanvegin, sambært Árant Jacobsen á teknisku deild í Tórshavnar kommunu. 

 

Brúgvin um Sandá skal eftir ætlan verða liðug á Ólavsøku.