Macron sigur nei til útsetan

Franski forsetin vil hava bretar at taka støðu nú

mynd: Ritzau / Scanpix

mynd: Ritzau / Scanpix

Franski forsetin Emmanuel Macron hevur ongar ætlanir um at loyva bretum at útseta Brexit enn einaferð. Tað skrivar Ritzau tíðindastovan í dag.

- Eg haldi ikki, at man skal góðtaka eina nýggja útsetan, segði hann á eini tíðindafundi í Brússel fyrr í dag, sambært Ritzau.

Bretska parlamentið skal í morgin atkvøða um eitt uppskot til eina skilnaðaravtalu, ið samráðingartoymini hjá Bretlandi og ES blivu samd um í gjár.

Um parlamentið vrakar uppskotið hjá bretska forsætisráðharranum Boris Johnson, er hann álagdur við lóg at biðja ES um loyvi at útseta Brexit fyri eina triðju ferð. Tað er í samsvar við eina samtykt hjá parlamentinum fyrr í ár, ið staðfesti, at um tað ikki eydnast at fáa eina semju í lag skal forsætisráðharrin søkja um eina útsetan av Brexit.

Boris Johnson hevur kortini sjálvur tvíhildið um, at óansæð um ein avtala verður fingið í lag, so fer Bretland úr ES 31. oktober.

mynd: Ritzau / Scanpix