Eg eri liðugur í Javnaðarflokkinum

Eg havi altíð følt meg væl saman við Gerhard Lognberg

- Javnaðarflokkurin hevur verið mítt eitt og alt, men nú eri eg liðugur í flokkinum.

 

Tummas Frank Joensen í Skúgvoy hevur verið limur í javnaðarflokkinum og varaformaður í Sandoyar Javnaðarfelag í eitt langt áramál.

 

Tá ið Gerhard Lognberg varð koyrdur úr Javnaðarflokkinum, gav hann ilt av sær og segði, at hann meldaði seg úr flokkinum.

 

- Eg havi meldað meg úr Javnaðarflokkinum munnliga og tann avgerðin stendur við, sigur Tummas Frank Joensen.

 

Hann sigur, at hann hevur fingið fundarboð til nevndina í Sandoyar Javnaðarfelag í næstu viku, men hevur boðað frá, at hann møtir ikki upp, tí hann er liðugur í flokkinum.

 

Men nú Gerhard Lognberg er farin upp í Sambandsflokkin, hevur Tummas Frank  Joensen ikki gjørt av, um hann fylgir við.

 

Hann sigur, at nú fer hann at hugsa seg um, hvat hann skal gera.

 

Men hann staðfestir, at hann hevur altíð følt seg væl saman við Gerhard Lognberg, Lognberg.

 

Les eisini: Gerhard Lognberg vorðin sambandsmaður

 

- Eg havi fylgt honum og eg havi stuðlað honum. Vit hava ikki altíð verið samdir, men eg havi verið nøgdur við hann, leggur skúvoyingurin afturat.

 

- Eg eri fríur sum fuglurin á takinum og eg veit ikki, hvønn veg eg fari, sigur hann.

 

Hann heldur, at Gerhard Lognberg hevur stríðst fyri arbeiðsplássum í Sandoy og hann heldur framvegis, at tað var skeivt at koyra hann úr flokkinum

 

- Tá ið tú lagar garð, kunnu allir steinar brúkast. Tað snýr seg bara at leggja teir rætt, sigur hann myndaliga.

 

Á myndini er Tummas Frank Joensen á landsfundi hjá Javnaðarflokkinum.