Tekur 600 ár at niðurbróta trol

Á Føroya Sjósavni á Argjum læra fólk eisini týdningin av at fara væl um náttúru og havøki.

Visti tú, at tað tekur 450 ár hjá náttúruni at niðurbróta eina plastfløsku?

Visti tú, at tað tekur 450 ár hjá náttúruni at niðurbróta eina plastfløsku?

Umframt at Føroya Sjósavni á Argjum hevur nógv forvitnisligt at bjóða teimum, sum vitja inn á gólvið, læra fólk eisini týdningin av at fara væl um náttúru og havøki. Í savninum er nevniliga eitt "fangandi" akvarium við trolpettum, plastfløsku, plastborðiski, plastposa og onkrum jarnbikari til dósamat.

 

Sagt verður, at tað tekur heili 600 ár hjá náttúruni at beina burtur - ella niðurbróta - eitt trolpetti, 450 ár at niðurbróta eina plast-sodavatnsfløsku, og eini 10-20 ár at niðurbróta ein beriposa úr plasti. 

 

Hetta er talandi og fangandi og sigur okkum, at vit eiga at ansa eftir ikki at lata slíkt fara út í náttúru og havøki. Tíðin tað tekur at niðurbróta plast og annað, ger, at rúgvan av burturkasti í umhvørvinum er vorðin øgilig, sum árini eru gingin.

 

Føroya Sjósavn, ið er ein sjálvsognarstovnur, byrjaði sítt virksemi í 2007 í gamla Íshúsinum á Argjum. Síðan henda dag hevur forvitnisliga og forkunnuga savnið tikið ímóti 10.000-14.000 gestum um árið.

 

Stórur partur av teimum, sum vitja savnið, er skúlaungdómar. Men, serliga um summarið koma eisini onnur fólk í stórum tali á gátt, og eingin ivi er um, at Føroya Sjósavn er eina vitjan verd, bæði hjá børnum og vaksnum.