Marathon verður í Havn 7. juni næsta ár

Føroyska flogfelagið, Atlantic Airways, verður í 2020 eins og undanfarnu tvey árini aftur høvuðsstuðul hjá Føroya einasta marathon, Atlantic Airways Tórshavn Marathon.

 

 

Árni Olsen, sølu- og marknaðarleiðari hjá Atlantic Airways og Ann Thomsen frá Bragdinum

Árni Olsen, sølu- og marknaðarleiðari hjá Atlantic Airways og Ann Thomsen frá Bragdinum

Tað er Bragdið, ið skipar fyri Atlantic Airways Tórshavn Marathon, og er hetta størsta staka ítróttartiltakið, sum rennifelagið skipar fyri. Hesum boðar Bragdið frá í tíðindaskrivi í kvøld.

Har vísa bæði Ann Thomsen frá Bragdinum og Árni Olsen, sølu- og marknaðarleiðari hjá Atlantic Airways frá, hvussu fegin tey eru um, at samstravið millum flogfelagið og rennifelagið kann halda fram:

– Vit hava verið sera fegin um samstarvið við Atlantic Airways hesi bæði undanfarnu árini og fegnast sjálvsagt um, at tað kann halda fram. Fyri okkum er týdningarmikið at hava ein virknan høvuðsstuðul, sum saman við okkum kann marknaðarføra renningina og menna teir møguleikar, sum eitt marathon hevur, eitt nú innan ferðavinnu, sigur Ann Thomsen frá Bragdinum.

Millum 600 og 700 luttakarar plaga at vera til marathon, hálvmarathon og gangihálvmarathon, og áhugin fyri at koma til Føroya at renna er vaksandi.

– Tað er náttúrligt fyri okkum í Atlantic Airways at stuðla einum heilsugóðum, sjónligum og jaligum tiltaki, sum er við til at seta Føroyar á heimskortið. Atlantic Airways Tórshavn Marahon man teljast millum vakrastu renniteinar í heiminum, og frá einum ferðavinnuligum sjónarhorni gevur hendan stuðulsavtalan góða meining fyri okkum, sigur Árni Olsen, sølu- og marknaðarleiðari hjá Atlantic Airways.

Atlantic Airways Tórshavn Marathon verður sunnudagin 7. juni 2020. Tilmeldingin letur upp í september 2019.

Árni Olsen, sølu- og marknaðarleiðari hjá Atlantic Airways og Ann Thomsen frá Bragdinum