Skopun og Sandur siga nei til Sea Shepherd

Meðan bátadráttir í Skopun og á Sandi eru blokeraðir fyri Sea Shepherd, er hetta eftir øllum at døma ikki galdandi í Skálavík og Húsavík.

Tær báðar størstu kommunurnar í Sandoynni, Sandur og Skopun, hava gjørt av, at Sea Shepherd sleppur ikki at brúka fasilitetir hjá kommununum fyri at leggja seg út í grindarakstur og møguligt grindadráp við bátum sínum.

 

Tí hava tey í Skopun stongt bátadráttin av við sterkari ketu og lási, og á Sandi hava tey sett stórar betongklossar fyri bátadráttirnar, soleiðis at Sea Shepherd ikki sleppur at brúka dráttirnar til sínar bátar. 

 

Tá in.fo seinasta sunnudag var ein túr í Skálavík og Húsavík og fregnaðist, var ikki líkt til, at dráttirnir har eru stongdir, eins og á Sandi og í Skopun. Tó skal viðmerkjast, at í Skálavík er beding, sum verður nógv brúkt um summarið.

 

Í Skálavík (sí mynd) stóð ein sluppungi á bedingini, og í Húsavík (sí mynd) sá ikki út til, at nakað var gjørt til tess at forða fyri, at ein og hvør ikki kann brúka dráttirnar við havnalagið.

 

Stóra viðhefta myndin vísir, hvussu Sands kommuna hevur gjørt fyri at byrgja upp fyri, at Sea Shepherd sleppur at brúka bátadráttirnar, sum kommunan eigur. Stórir betongklossar eru lagdir fyri omankoyringina, soleiðis at eingin bátur kann sjósetast í bygdini.