Djordjevic nýggja avbjóðing

Venjarin hjá KÍ kvinnunum seinastu árini verður ikki arbeiðsleysur

Seinnapartin í dag, tá ið KÍ kvinnurnar høvdu fingið fimtandu gullkrónurnar um hálsin, staðfesti venjarin seinastu mongu árini, at hann fer ikki at halda fram í felagnum.

Aleksandar Djordjevic segði, at tað er best fyri KÍ kvinnurnar, at tær finna nýggjan venjara, og at tað er best fyri hann at finna eitt nýtt felag.

Longu í kvøld er tað greitt, at Aleksandar Djordjevic verður ikki arbeiðsleysur.

Á heimasíðu síni skrivar Argja Bóltfelag, at felagið hevur skrivað tvey ára sáttmála við Aleksandar Djordjevic. Umframt at venja 1. deild kvinnur fer hann eisini at taka sær av gentum 14-17 ár, sigur Erling Ellendersen, sum er formaðurí AB.

Endaliga støðutalvan fyri 2014 sigur, at talan er um stóra avbjóðing hjá meistaravenjaranum. AB endaði á sætta og aftasta plássi við 4 stigum og málmuninum 17-84 fyri 20 dystir.

 

mynd: ab.fo