Lions í Suðuroy letur 80.000 krónur

Aftur í ár hevur Lions klubburin í Suðuroy latið átakinum “Í Menniskjum Góður Tokki” stuðul.

 

 

Lions í Suðuroy hevur latið hjálparfelagsskapinum 80.000 krónur, sum verður brúktur til jólahjálp til familjur, sum ikki hava so góð ráð at halda jól.

 

Hetta er peningur, sum Lions klubburin hevur savnað saman við at selja jólakalendarar, sum klubburin sjálvur hevur latið gera.  

 

Aðrir Lions Klubbar í Føroyum hava eisini fingið jólakalendarar frá Lions í Suðuroy at selja.  

 

Og tað vísir seg, at fólk tóku so væl ímóti Lionskalendaranum, at tilsamans fer “Í Menniskjum Góður Tokki” onkustaðni ímillum 300.000 krónur og 400.000 krónur frá Lions Klubbunum í Føroyum í ár.    

 

Lions klubburin í Suðuroy hevur stuðlað ”Í Menniskjum Góður Tokki” á hvørjum ári, síðan hesin felagskapur bleiv settur á stovn fyri fýra árum síðani.    

 

Fyrsta árið stuðlaði klubburin við 15.000 krónum og annað árið var stuðulin 10.000 krónur.   

 

Triðja árið var eitt serstakt ár, tí tá stuðlað Lions Klubburin í Suðuroy átakinum við 100.000 krónum og tað er størsti einstaki stuðul, ”Í Menniskjum Góður Tokki” hevur fingið.  

 

Og nú  fjórða árið var stuðulin, sum nevnt 80.000 og hetta ger Lions Klubban í Suðuroy til størsta stuðulsveitara hjá felagsskapinum yvirhøvur.   

 

Hesin stuðulin til ”Í Menniskjum Góður Tokki” í ár, er samstundis stuðul nummar 100, Lions klubburin í Suðuroy letur, síðani hann varð stovnaður í 1986.  

 

Tilsamans hevur Lions Klubburin í Suðuroy latið 3,2 milliónir í stuðuli til mentanarlig og vælgerandi endamál hesi 27 árini, klubburin hevur verið til. Tað eru góðar 118.500 krónur um árið í miðal.