Fullsett á Borgini

Umleið 150 fólk hittast til oljuráðstevnu á Christiansborg ídag. Endamálið er at varpa ljós á tær avbjóðingar, ið ein komandi oljuvinna hevur við sær fyri føroyska samfelagið

Sjúrður Skaale, fólkatingsmaður, leggur síðstu hond á fyrireikingarnar til oljuráðstevnu á Christiansborg

Sjúrður Skaale, fólkatingsmaður, leggur síðstu hond á fyrireikingarnar til oljuráðstevnu á Christiansborg

Endamálið við ráðstevnuni er at viðgera, hvat hendir við føroyska samfelagnum, um so er at olja verður funnin. Ráðstevnan setir fokus á tær avbjóðingar, sum ein framtíðar oljuvinna kann hava fyri samfelagið. Tað veri seg politiskt, búskaparliga, vinnuliga og fyri føroyska arbeiðsmarknaðin og samfelagið annars.

 

- Tað snýr seg í stuttum um, hvussu Føroyar skulu skipa seg í mun til vinnuligu avbjóðingarnar, útlendska arbeiðsmegi, ójavnt lønarlag, stættarmun og onnur árin, sum kunnu standast av einari oljuvinnu, sigur Sjúrður Skaale.

 

Fólkatingsmaðurin hjá Javnaðarflokkinum hevur tikið stig til ráðstevnuna, ið hann velur at halda í Keypmannahavn, hóast málbólkurin fyrst og fremst eru føroyingar og føroyska samfelagið.

 

- Sjálvandi kundi ráðstevnan eisini verið hildin í Føroyum. Men mín uppgáva sum fólkatingsmaður er eisini at knýta føroyingar í Danmark tættari at føroyska samfelagnum. Og her hava útisetar møguleika at hoyra nærri um framtíðar avbjóðingar hjá okkara samfelag, sigur Sjúrður Skaale.

 

Ikki færri enn níggju fólk fara at hava hvør sína framløgu á ráðstevnuni í Felagssalinum á Christiansborg seinnapartin.

 

Áhoyrararnir fáa fyrst innlit í, hvussu grannarnir fyri eystan hava skipað sína oljuvinnu. Ole Anders Lindseth, ið er ein av leiðandi persónunum í norska oljumálaráðnum, fer fyrst at greiða frá, hvussu Norra fyrireikaði seg til oljuvinnuna og hvussu landið síðani hevur skipað sína oljuvinnu fyri at stýra uttan teir vandar, ið ein tílík vinna kann hava við sær.

 

Føroysku fyrilestrahaldararnir á ráðstevnuni eru hesir:

 

Árni Olafsson, fyrrverandi ráðgevi og samráðingarleiðari fyri landsstýrið

Johan Dahl , landsstýrismaður í vinnumálum

Magni Laksáfoss , búskaparfrøðingur og fyrrverandi landsstýrismaður 
í fíggjarmálum

Selma Ellingsgaard, forkvinna í Starvsmannafelagnum

Magni Arge, formaður í Oljuvinnufelagnum

Jan Müller, stjóri í Føroya Oljuídnaðarbólki

Tórbjørn Jacobsen, havnameistari og fyrrverandi landsstýrismaður 
í oljumálum

Aksel V. Johannesen, formaður í Javnaðarflokkinum