Royna at hava eina nøkulunda vanliga ólavsøku

Koronasmittan ger, at ólavsøkan í ár ikki verður heilt, sum vit kenna hana

Ólavsøkan í ár verður hildin so vanligt, sum til ber, hóast umstøðurnar við korona.

Hetta lovar Tórshavnar kommuna, sum nú hevur luftað nakrar av ætlanunum fyri tjóðarhátíð okkara, sum verður um góðan mánaða.

– Býurin verður skrýddur og prýddur, og ólavsøkan verður sett við skrúðgongu, sum siður er ólavsøkuaftan. Tó verða færri luttakandi sambært almennu tilmælunum, skrivar Tórshavnar kommuna, sum sigur seg hava fult álit á, at havnarfólk og gestir taka øll neyðug fyrilit, og at hvør ansar sær sjálvum.

Ólavsøkan verður, sum vit kenna hana við hesum broytingum:

• Miðnáttarsangurin verður í grannaløgum og verður sendur beinleiðis í Kringvarpi Føroya
• Einki tivoli verður á Skálatrøð

Matstovur, kaffistovur og onnur vinna hevur opið sum vant, tó verður meira útiborðreiðing enn vanligt.

Ólavsøkukappróðurin verður, fótbóltur verður, ólavsøkuframsýningin verður umframt onnur tiltøk, sum gera ólavsøkuna til tjóðhátíð føroyinga. Nærri skrá kemur í næstum.

Kommunan bjóðar haraftrat grannaløgum og eigarafeløgum at skipa fyri, hugna um, og halda ólavsøku í grannaløgum í kommununi. Til ber at søkja kommununa um stuðul til hetta. Boð verða í næstum givin um, hvussu søkt verður um pengar til at halda ólavsøku í grannaløgum.