Dreymurin brast í fyrstu venjingini

Verjuleikari á landsliðnum hevur fingið skaða og verður ikki við ímóti Finnlandi.

Tá ið føroyska landsliðið til EM-undankappingardystin ímóti Finnlandi varð úttikið, vóru tað nakrir, ið vórðu úttiknir á fyrsta sinni. Ein teirra var 22 ára gamli vinstri bakkurin hjá B36, Alex Mellemgaard. Ynskið um at sleppa at spæla á landsliðnum á hesum sinni brast tó næstan eins skjótt sum tað byrjaði, tí Alex gjørdist skaddur longu í fyrstu venjingini og verður ikki tøkur til dystin.


Alex fekk eitt slag aftanfyri knæið og hevur pínu bæði í knænum og í tjúkkanum. Hóast hann nú kann skjóta ein hvítan píl eftir at vera við á landsliðnum á hesum sinni, so fær skaðin neyvan ávirkan á landskappingina og B36. Metingarnar hjá teimum serkønu eru, at hann helst kann byrja at venja aftur í næstu viku.


- Hóast eg eri ógvuliga vónbrotin um at vera skaddur og at eg ikki kann vera við, so var hetta eitt stórt upplivilsi fyri meg. Eg haldi, at allir spælarar droyma um at vera við á A-landsliðnum, sigur Alex, sum fegnast um at hann yvirhøvur varð úttikin:


- Tað var ordiliga gott, tí so veit man, at man hevur gjørt eitt gott arbeiði. Nú er bara at blíva frískur aftur sum skjótast og gera tað enn betri og vóna, at eg fái møguleikan aftur, sigur Alex Mellemgaard at enda.