Samferðslan er steindeyð í morgun

Tað kemur ikki lív í fyrr enn seinnapartin, men eisini tá verður tað avmarkað

Tað eru ikki góð líkindi hjá Teistanum, so hann verður liggjandi við bryggju, men seinnapartin er ætlanin at gera eina roynd

Tað eru ikki góð líkindi hjá Teistanum, so hann verður liggjandi við bryggju, men seinnapartin er ætlanin at gera eina roynd

Illveðrið hetta vikuskiftið hevur stórar avleiðingar fyri samferðsluna. Á landi hevur Strandferðslan fyribils avlýst alla koyringina hjá Bygdaleiðum í dag og boðini eru, at koyrt verður eftir ferðaætlanini í morgin.

– Tað er eingin drift í morgun, tí skipini sigla ikki og bussarnir koyra ikki, sigur Marin Hentze Gaardlykke, ferðslusamskipari hjá Strandferðsluni.

Smyril og Teistin hava avlýst allar túrar í morgun og í dag, og teir fara ikki í sigling fyrr enn seint seinnapartin. Eingin sigling er til Fugloyar og Svínoyar og eisini Jósup, sum siglur upp á Nólsoynna, hevur fyribils avlýst alla sigling.

Strandferðslan sigur, at hjá Smyrli eru siglingarlíkindini góð, men at tað er ikki ráðiligt at manøvrera í Tórshavnar Havn í slíkum líkindum, sigur Marin Hentze Gaardlykke.

Sam ætlar at gera eina roynd at fara í Kallsoyna, og eydnast tað, verður siglt eftir ferðaætlanini.

Eisini flogfør eru seinkað. Eitt flogfar, sum skuldi lenda stutt eftir døgverða, er sett at lenda seint seinnapartin.

Tað verður ringt veður í dag, og hóast tað hæsar av eftir døgverða, verður tað framvegis nógvur vindur. Tað verður ikki fyrrenn í kvøld, at veðrið batnar av álvara og tá er mestsum øll koyring hjá Bygdaleiðum kortini av nú um vikuskiftið.

Tað eru ikki góð líkindi hjá Teistanum, so hann verður liggjandi við bryggju, men seinnapartin er ætlanin at gera eina roynd