Sjey vilja vera prestur í Norðstreymoy

Umsóknarfreistin til bæði embætini sum sóknarprestur í Norðstreymoy var úti á middegi í gjár, tann 17. juni.

Hvalvíkar kirkja

Hvalvíkar kirkja

Bispur veit at siga, at Norðstreymoyar vestara prestagjald fekk fýra umsóknir. Prestagjaldið fevnir um tríggjar kirkjusóknir: Vestmanna, Kvívík og Kollafjørður. Prestagarður er til embætið, og komandi sóknarpresturin kemur at búgva í Vestmanna.

Norðstreymoyar eystara prestagjald fekk tríggjar umsóknir. Prestagjaldið fevnir um fimm kirkjusóknir: Tjørnuvík, Haldórsvík, Hvalvík, Saksun og Hósvík. Prestagarður er til embætið, og komandi sóknarpresturin kemur at búgva í Hvalvík.

Tað eru kirkjuráðini í prestagjaldinum, ið innstilla sóknarprestin. Biskupur er fyrisitingarligur leiðari. Landsstýrismaðurin í kirkjumálum útnevnir sóknarprestin, og dómprósturin skipar hann í embætið.

Jógvan Fríðriksson, bispur, sigur, at ætlanin er at fáa málsviðgerðina væl greidda úr hondum einaferð um mánaðarskiftið juni/juli.

Hvalvíkar kirkja