So nær landi fiska bátarnir

- Vit hava tikið ímóti fiski frá bátum, sum hava fiskað á Fuglafirðri, og seinastu dagarnar hevur hetta verið góður fiskur, sigur Kaj Otto Frederiksberg hjá Norðfra.

 

 

Seinastu dagarnar hava vit sæð sjaldsom fyribrigdi ymsastaðni kring landið, har nógvur toskur hevði staðið næstan í klettin ella bryggjuna. Slík fyribrigdi hava verið at sæð inni á Sørvági, og tey hava eisini verið at sæð eitt nú inni á Vestmanna og á Fuglafirði, har bátar hava gjørt góðar dagar.

Tað var í endanum av seinastu viku, at menn byrjaðu at fáa tosk stutt út fyri Pelagos-bryggjuni í Fuglafirði, og seinni hevur eisini verið toskur at fingið nakað longur úti á fjørðinum.

Vit mugu gita, at fiskurin leitar eftir føði.

In.fo skilir, at frárensl við fiskaslógvi og vatni frá Pelagos-virkinum liggur í røri nakrar hundrað metrar úr landi og út á einum dýpi, sum er einar 25-30 metrar. Vit hava eisini skilt, at frárensl, sum kemur frá framleiðsluni hjá Havsbrún, verður leitt út um Ennið, tey rópa í Fuglafirði – og út á streymasjógv.

Eisini her úti hava bátar fingið tosk, sum hevur leitað sær undir land.

##med2##

Soleiðis, sum viðheftu myndir vísa, ið eru tiknar hósmorgunin í Fuglafirði, liggja hesa løtu einir 10-12 bátar og fiska innari og ytri á Fuglafirði.

Kaj Otto Frederiksberg, sum starvast hjá Norðfra í Leirvík, sigur, at tað eru dagar, har teir taka ímóti nógvum útróðrarfiski. - Vit hava eisini tikið ímóti fiski, sum bátar á Fuglafirði hava fingið hesar seinastu dagarnar.

Hann vísir á, at í byrjanini var fiskurin smærri, og her var fiskur ímillum, sum var rak. Men, seinnu dagarnar hevur fiskurin verið størri, og hann hevur eisini verið betri. Hetta er fiskur, sum fyri tað mesta liggur um eini 3-5 kilo. At síggja til er fiskurin, sum bátarnir hava fingið hesar seinnu dagarnar, ein heilt annar, tí hann hevur eisini verið fullur í livur.

Kaj Otto Frederiksberg sigur, at eini 23 tons av útróðrarfiski komu upp á land í Leirvík seinasta leygardag, og tá er hetta eisini fiskur, sum er veiddur aðrastaðni – umleið helmingurin veiddur við snellu og hin helmingurin við línu.

- Av teimum, sum hava fiskað á Fuglafirði, hava onkrir bátar siglt til Leirvíkar at leggja fiskin upp, og aðrir hava koyrt fiskin til Leirvíkar. Bestu bátar á Fuglafirði hava hesa vikuna ligið upp í eini 1200-1500 pund um dagin. So, hetta er púrasta óhoyrt, og tað verður spennandi at vita, sum tíðin gongur, hvat hetta sjaldsama fyribrigdi merkir, heldur hann fyri.

##med3##