Nógvur svartkjaftur í Fuglafirði

Havsbrún í Fuglafirði fær meiri enn 10.000 tons av svartkjafti hesar dagarnar.

Í gjár landaði Slættaberg góð 1.300 tons, og í dag landar Christian í Grótinum umleið 1.900 tons. Síðani koma Finnur Fríði og Jupiter við 2.500 tonsum í part og at enda Tróndur í Gøtu við 2.600 tonsum. 

 

Jupiter og Tróndur í Gøtu noyðast at bíða, áðrenn tey sleppa framat at landa, men hesaferð valdu bæði skipini kortini at fara á Fuglafjørð heldur enn at fara til Íslands. 

 

Tey føroysku uppsjóvarskipini hava roynt í ES-sjógvi. Svartkjafturin er á veg norðureftir, men hann er ikki komin í føroyskan sjógv av álvara enn, og tað er heldur seinni enn vanligt.