Spísikamarið fekk Grønu gávuna frá Etika

Peningurin, sum etika fær fyri at selja vatn á matstovuni fer allur óskerdur til eina umhvørvisgávu. Hetta er fimtu ferð, at Etika letur Grønu gávuna í sambandi við umhvørvisvikuna í Havn

Í sambandi við Umhvørvisvikuna hjá Tórshavnar kommunu letur sushi matstovan Etika eisini eina »grøna gávu«, sum stavar frá pengum, sum tey í Etika hava selt vatn fyri. Inntøkan fyri søluna av vatni fer óskerdur til hesa gávu, sum er til einstakling, fyritøku, stovn ella felagsskap til umhvørvisendamál.

 

Hesaferð er tað so Sjónvarpssendigin Spísikamarið, sum fær gávuna, sum er 46.970 krónur

 

Grundgevingarnar hjá dómsnevndini fyri at lata Spískamarinum Grønu gávuna 2014, eru hesar:

 

»Tit hava skapt eina sending, sum sameinir náttúruuppliviingar, veiðimentan, bygdaumhvørvi, urtagarðshald, villan plantuvøkstur, vanliga føroyska matmentan og gourmet mat á hægsta støði.

 

Talan er um eina matmentanarsending, har høvuðsdentur ikki bara er lagdur á góða rávøru, men  alla ta einastandandi rávøru, vit finna í føroysku náttúruni. Tit hava víst føroyingum, at til ber at brúka føroyskar rávørur á ein nýggjan og spennandi hátt.

 

Vit hitta veiðimannin, bóndan, fiskimannin og urtagarðsfólkið, bygdamannin og bygdakonuna. Vit fara í bjørgini, í hagan og á sjógvin. Vit fylgja rávøruni frá tí hon verður fingin úr náttúruni, til hon verður sett á borðið. Siðbundið føroyskt tilfeingi verður matgjørt sum vit aldri hava sæð tað áður við kryddurtum og øðrum, vit valla vistu um.

 

Sendingin er prógv um ótroyttar møguleikar, og at vit eiga eitt forkunnugt og fjølbroytt tilfeingi í føroysku náttúruni. Hartil er sendingin útflutningsvøra, framleidd á høgum støði, sum ikki stendur aftan fyri nakra av teimum útlendsku.

 

Grøna gávan frá Etika í ár verður latin Spískamarinum.«

 

Tann 7. juii í 2009 lat etika hurðarnar upp á fyrsta sinni – og verður Etika fimm ár í summar.

 

– Hetta er sostatt fimta Grøna Gávan síðan byrjan, og hevur etika latið 214.116 krónur á henda hátt til eitthvørt gott umhvørvisendamál seinastu fimm árini, sigur Johannes Jensen, stjóri á Gist & Vist, sum m. a. rekur matstovuna etika.

 

Tey ið hava móttikið grønu gávuna frá etika eru:

2010 Finnbogi Joensen, kr 33.088
2011 Føroya Prent, kr 42.320
2012 Anna Louisa Joensen, kr 45.644
2013 Reinhaldið í Tórshavn, kr 46.094
2014 Spískamarið, kr 46.970

 

– Í dag eta meiri enn 200 føroyingar sushi hvønn dag, sigur Johannes Jensen smílandi at enda.