Súkkluumstøðurnar mugu betrast í Føroyum

Sum partur av nýggju samferðsluætlanini mælir Landsverk til at játta 10 milliónir um árið til at betra um súkkluumstøðurnar í Føroyum.

- Súkklukervið eigur at vera ein partur av heildarmyndini og samanbundið við aðrar gøtur og leiðir, sigur Landsverk og leggur aftrat, at samstarv eigur at vera millum Landsverk, kommunur og aðrar viðkomandi partar, soleiðis at ein samanhangandi súkkluætlan kann fremjast.

Landsverk vísir á, at umframt heilsuágóðarnir av at súkkla, so er dálkar súkkling ikki, eins og brennievnisferðsla ger, og er sostatt eisini betri fyri umhvørvið.

Eisini vísir Landsverk á, at í árligu nøgdsemiskanningunum hjá Visit Faroe Islands spyrja fleiri ferðafólk eftir súkklumøguleikum, og at Føroyar kundu verið eitt hugtakandi og dámligt land at síggja av súkklusaðli.

Tær 10 milliónirnar kundu verðið settar í ein verkætlanargrunn, sum kundi latið pening til verkætlanir, sum kommunur og land gera í felag.