Lúsin er nær tengd at alibrúkum

- Vindur hevur sera stóran týdning fyri útbreiðsluna av laksalúsayngli, vísa kanningar hjá Fiskaaling.

- Tað hevur verið sera torført at finna lúsayngul í sjónum, og tí er vitanin um útbreiðslu av lúsayngli sera avmarkað.

 

Tað veit Fiskaaling at siga í síni nýggjastu útgávu av Alitíðindum, sum kom út í samband við aliráðstevnuna.

 

- Á heysti í 2013 fóru vit undir at kanna hesi viðurskifti í Sundalagnum. Úrslitini higartil vísa, at nøgdin av seiðalúsayngli er hægst um veturin. Um summarið kundu vit ikki ávísa seiðalúsayngul í royndunum.

 

Fiskaaling vísir á, at nøgdin av laksalúsayngli tykist vera tengd at alivinnuni, og eisini eru ábendingar um, at nøgdin av yngli øktist tíðliga um várið.

 

- Tættleikin á laksalúsayngli var munandi hægri tætt við alibrúk enn longri frá, og útbreiðslan var tengd at streymviðurskiftunum á staðnum.

 

Lagt verður aftrat, at vindur hevur sera stóran týdning fyri útbreiðsluna av laksalúsayngli.

 

- Í tveimum umførum vórðu kanningar gjørdar víða um í Sundalagnum. Fyrru ferð hevði verið vesturætt frammanundan, og tá var laksalúsayngulin at finna við eysturoyarlandið.

 

Víst verður á, at seinnu ferð hevði verið eysturætt frammanundan, og tá var lúsayngulin at finna streymoyarmegin.

 

- Hinvegin vísti seiðalúsin heilt annað útbreiðslumynstur, og kann munurin standast av øðrvísi ferðingarmynstri uppi og niðri í sjónum, heldur Fiskaaling.