Kári leggur eftir Landsverki

– Villeiðandi upplýsingar frá Landsverki og ein almenn øsingarherferð beindu tá avtornaði fyri privata Eysturoyartunlinum, sigur Kári P. Højgaard eftir ein heilan dag á avhoyringarbonkinum

Kári P. Højgaard fanst hvassliga at Landsverki, tá hann í dag svaraði spurningum frá kanningarstjóranum Hans Gammeltoft Hansen

Kári P. Højgaard fanst hvassliga at Landsverki, tá hann í dag svaraði spurningum frá kanningarstjóranum Hans Gammeltoft Hansen

– Villeiðandi upplýsingar frá Landsverki og ein almenn øsingarherferð beindu tá avtornaði fyri privata Eysturoyartunlinum, sigur Kári P. Højgaard eftir ein heilan dag á avhoyringarbonkinum

 

Fleiri ferðir undir drúgvu avhoyringini segði Kári P. Højgaard seg hava fulla heimild at samráðast og skriva undir avtalu við CIP um Eysturoyartunnilin.

 

Hans Gammeltoft Hansen er biðin um at kanna leiklutin hjá nú fyrrverandi landsstýrismanninum í innlendismálum í sonevnda tunnilsmálinum. Kanningarstjórin skal eisini meta um, hvørt Kári P. Højgaard hevur brotið lógina um ábyrgd landsstýrismanna við at halda upplýsingar aftur fyri løgtinginum.

 

Drúgva avhoyringin, ið vardi meginpartin av hósdegnum, gav eina mynd av einum landsstýrismanni, ið hevði fult og nærum blint álit á sínum embætisverki í Innlendismálaráðnum.

 

– Tað var ongantíð nakar ivi um heimildina, hvørki millum ovastu embætisfólkini í Innlendismálaráðnum, embæðisfólkini á Løgmansskrivstovuni ella í landsstýrinum. Løgmaður fór enntá so langt sum at siga, at tað var ikki við sær sum løgmanni, at tað almenna fór undir at gera ein almennan Eysturoyartunnil. Tí fór eg, við bestu serfrøðini á økinum, undir tilgongdina fáa privatar at átaka sær uppgávuna at gera tunnilin, greiðir Kári P. Højgaard frá.

 

Men meðan Kári P. Højgaard hevði fult álit á sínum embætisfólkum og eisini tí uttanhýsis ráðgeving, ið Innlendismálaráðið keypti sær í tunnilsmálinum, so er øðrvísi við álitinum á Landsverk.

 

Hektiska tíðarskeiðið áðrenn sáttmálin við CIP ætlandi skuldi undirskrivast í Løkshøll í Runavík, hósdagin 27. juni klokkan 10, kom Landsverk í tveimum umførum við upplýsingum, ið sambært Kára P. Højgaard vóru at rokna sum reinar torpedo’ir móti privatu tunnilsætlanini.

 

Landsstýrismaðurin var biðin um at upplýsa fyri løgtinginum, hvat Eysturoyartunnilin fór at krevja av almennum samferðsluútbyggingum báðumegin tunnilsmunnan. Svarið frá Landsverki var, sambært nú fyrrverand landsstýrismanninum, ein politisk bumba:

 

– Svarið var tikið úr samferðsluætlanini næstu mongu árini, alt varð lagt saman og gav eina mynd av íløgum fyri fleiri enn 600 milliónir krónur. Ein mynd, ið sjálvandi elvdi politiskt rumbul, greiddi Kári P. Højgaard frá undir avhoyringunum.

 

Ein onnur bumba kom eisini frá Landsverki, tá stovnurin var biðin um at geva sínar viðmerkingar til ein grein-52 spurning til landsstýrismannin at svara.

 

– Landsverk kom tá við einum svari, ið segði at privata tunnilsloysnin var 1,9 til tríggjar milliardir krónur dýrari enn ein almenn tunnilsloysn, sigur Kári P. Højgaard, sum framman fyri kanningarstjóranum greitt gav til kennar sína andstygd móti leiklutinum hjá Landsverki.

 

– Eitt svar til løgtingið skal vera vegleiðandi, ikki villeiðandi. Hetta svarið var bensin á eitt bál. Sum landsstýrismaður skal eg svara eftir mínari bestu sannføring, og tí valdi eg snøgt sagt at síggja burtur frá hesum upplýsingum frá Landsverki, greiðir Kári P. Højgaard frá.

 

Hans Gammeltoft Hansen er biðin um at kanna, um Kári P. Højgaard hevur framt brot á lóg um ábyrgd landsstýrismanna við ikki at lata løgtinginum allar upplýsingar.

 

Í morgin sigur Kaj Leo Holm Johannesen á avhoyringarbonkinum hjá Hans Gammeltoft Hansen. Mánadagin verða Jenis av Rana, formaður í Miðflokkinum, og løgmansstjórin Marjun Hanusardóttir avhoyrd.

 

In.fo tosaði við Kára P. Højgaard eftir avhoyringina í dag. Í samrøðuni útgreinar fyrrverandi landsstýrismaðurin sínar útsøgnir um Landsverk, leiklutin hjá løgmanni í málinum og hví hann framvegis heldur at rætt hevði verið at skriva undir sáttmáln við CIP í Løkshøll 27. juni í fjør. Hoyr samrøðuna við at trýsta á pílin undir myndini.