Ein øgiliga vandamikil tanki

- Vit mugu aldrin aftur á tað gamla sporið við studningi, tí har hava vit brent okkum illa

- Fiskivinnan skal ikki aftur hava stuðul úr landskassanum.

Tað staðfestir Bárður Nielsen, tingmaður fyri Sambandsflokkin, og formaður í fíggjarnevndini hjá Løgtinginum.

 

Rodmundur Nielsen, tingmaður fyri Fólkaflokkin, hevur annars mælt til, at vit umhugsa at veita fiskivinnuni stuðul aftur, tí hon hevur so ómetaliga stóran týdning fyri livikorini kring landið.

 

Les eisini: Gull vert fyri okkum

 

Men Bárður Nielsen er alt annað enn samdur.

- Tað er øgiiga vandamikið at hugsa tankan um at at lata vinnuni stuðul aftur.

- At lata landskassan upp fyri vinnuni at fáa stuðul úr, er ein skeiv gongd, sigur hann.

 

Hann heldur, at talan kann ikki verða um at lata vinnuni vanligur rakstrarstuðul, sum tað var fyrr.

- Men tað kann vera í ávísum førum, at íløgustuðul kann latast til nýtt virksemi, men ikki vanligur rakstrarstuðul, sigur hann.

 

Hinvegin staðfestir Bárður Nielsen, at tað er ikki rávørutrot í fiskivinnuni.

- Vit hava ríkiligt av fiskiríkidømi og í veruleikanum hava vit ongantíð havt so stórt fiskivinnuríkidømi sum nú.

- Tað er rætt, at ríkidømið er ikki í toski, men vit hava aldrin havt nær í námind so nógvan makrel sum nú, svartkjaftastovnurin er við at mennast aftur og vit hava ein rímiligan part av sildakvotuni.

 

Formaðurin í fíggjarnevndini sigur, at tað sum umræður, er, at vinnan má hugsa nýtt og gera sær greitt, at vit hava eina aðra rávøru nú enn vit hava havt, og at tað ber til at framleiða annað enn at skera flak og salta tosk og hvat annað ið verður gjørt burtur úr botnfiskinum.

- Heldur enn at lata landskassan upp fyri vinnuni, eiga vit at eggja vinnuni til at leggja á annan bógv og finna framleiðslu burtur úr teirri rávøru vit hava, sigur Bárður Nielsen.

- Er tað onkur, sum hevur eitt hugskot, eiga tey eisini at fáa atgongd til rávøruni, leggur hann afturat.

- Tað er týdningarmikið at vit brúka tær góðu tíðirnar til at skapa eitt framkomið kappingarført samfelag ístaðin fyri at brúka tær sum ein kodda.

- Lat vinnuna hugsa nýtt, tí tað dugur hon, leggur hann afturat. 

 

Helgi Abrahamsen, tingmaður, fyri sambandsflokkin, er púra samdur við floksfelagan.

Hann sigur, at talan kann ikki verða um at lata rakstrarstuðul aftur, tí tað hava vit brent okkum av.

- Tað sporið mugu vit fyri alt í verðini ikki inn á aftur, tí so halda vit lív í eini vinnu, sum ikki ber seg heldur hann. 

Men hann heldur, at vit kunnu tosa um íløgustuðul ella íverksetarastuðul av onkrum slagi.