Sarah Palin peikar á Trump

Donald Trump hevur vunnið ein týdningarmiklan stuðul.

Sarah Palin

Sarah Palin

Nú tað einans eru góðar tvær vikur til, at veljararnir í amerikanska statinum Iowa, sum teir fyrstu, fáa møguleikan at siga sína hugsan um hvør skal verða forsetavalevni hjá Republikanska flokkinum, er kappingin millum valevnini harðari enn nakrantíð áður.


Ein ørgrynna av politikarum, ið allir droyma um at gerast næsti forsetin í USA, stríðast enn um at vinna tokkan hjá veljarunum.


Eitt av amboðunum til tess, er at fáa stuðul frá ymiskum kendum persónum, og í gjárkvøldi gjørdist greitt, at Donald Trump, ið liggur á odda í flestu veljarakanningum, hevur eydnast at vinna stuðulin frá einum av mest umtalaðu varaforsetavalevnunum síðstu árini.


Tað er Sarah Palin, fyrrverandi guvernørurin fyri Alaska, og varaforsetavalevni hjá John McCain í 2008, ið nú alment hevur boðað frá, at hon stuðlar Donald Trump.


- Eg eri stolt av at geva mín stuðul til Donald J. Trump, verður Palin endurgivin fyri at siga á heimasíðuni hjá Trump.


Sarah Palin, ið hevði stóran stuðul millum konservativu veljarafjøldina, harímillum Tea Party rørsluna, er higartil størsta politiska navnið, ið hevur givið Trump sín stuðul.


- Tað er ein stórur heiður fyri meg, at móttaka stuðulin frá Sarah. Hon er ein vinur, og eitt sera gott menniskja, ið eg havi stóra virðing fyri. Eg eri stoltur at hava fingið hennara stuðul, segði Trump um almenna stuðulin.


Stuðulin frá Palin kann gerast sera týdningarmikil í júst Iowa, har Trump og Ted Cruz, sambært veljarakanningunum, eru í hørðum stríði um atkvøðurnar. Tað kann gerast avgerandi fyri úrslitið, at Palin enn hevur eina høga stjørnu hjá teimum evangelisku veljarunum, ið umboða ein fittan part av republikanska veljaraskaranum í Iowa.