Eingin kann fáa ilt av samkyndum hjúnalagi

Poul Michelsen vildi ikki selja sína sál og sína sannføring

Eingin kann fáa ilt av, at tvey fólk, sum eru góð við hvørt annað, sleppa at leggja sítt lív í tryggjar lógarkarmar, so at tey kunnu virka á jøvnum føti við øll onnur.

 

Tað sigur Poul Michelsen, tingmaður.

 

Hann er ein av teimum, sum hevur lagt uppskot fyri Løgtingið um at loyva samkyndum hjúnalagi og sum løgtingið viðger í dag.

 

Poul Michelsen segði, at yvirhøvur hevur tað verið so torført at fáa málið fram á Løgtingi, at tað neyvan kennir sín líka, at tað hevur verið so torført hjá fólkavaldum at fáa eitt tingmál fyri Løgtingið.

 

Umsitingin í Løgtinginum kundi ikki hjálpa til at fyrireika málið, men tað hava løgfrøðingar uttanhýsis hjálpt til og tað er orsøkin til, at tað er komið so langt.

 

Poul Michelsen staðfestir, at fyri tey í Framsókn hevur persónliga øgiliga stóran  týdning.

 

Hann vísir eisini á, at tá ið hendan samgongan varð skipað, fekk Framsókn í boðið at vera við.

Men treytin var, at flokkurin bant seg til at hann skuldi ikki atkvøða fyri etiskum málum av hesum slagi.

 

- Hetta er eitt ógvuliga grundleggjandi mál og vit vildu ikki selja okkara sál og sannføring fyri ein sess í samgonguni sigur Poul Michelsen, og hann er framvegis ivaleysur í, at tað var ein røtt avgerð.

 

Poul Michelsen sigur, at samkynd hjúnalag er ikki ein spurningur um trúgv, men um mannarættindi og javnrætt fyri fólk, sum ikki hava sama rætt, sum øll onnur.

 

- Tað kann eingin fáa ilt av, at tvey fólk, sum eru góð við hvørt annað, sleppa at leggja sítt lív í tryggjar lógarkarmar, so at tey kunnu virka á jøvnum føti við øll onnur.

 

Síggj fleiri myndir frá viðgerðini í Løgtinginum í dag við at TRÝSTA HER

 

Hann væntar ikki, at málið verður samtykt. Men hann ger samstundis greitt, at hetta málið sleppur ikki at doyggja og tað er bara ein spurningur um tíð áðrenn tað verður samtykt.

 

Les eisini: Samkynd hjúnaløg kunnu ættleiða børn

Les eisini: Gifta samkynd uttanfyri Løgtingið