Pengar mugu fylgja við

Tað er upp á tíðina, at landsstýrið krevur, at almennir stovnar skulu taka lærlingar, men tað má ikki raka starvsfólkini, sum longu eru á stovninum

 

Nú verður tað eitt krav, at almennir stovnar skulu taka lærlingar.

 

Tað staðfesti Jørgen Niclasen, landsstýrismaður í fíggjarmálum, á landsfundinum hjá Fólkaflokkinum leygardagin.

 

Selma Ellingsgaard, forkvinna í Starvsmannafelagnum, heldur, at hetta er bæði neyðugt og tiltrongt.

 

Men fortreytin er, at pengar fylgja við, so at starvsfólk, sum longu eru á stovninum, ikki skulu noyðast at víkja fyri at stovnurin kann lúka eitt krav um at taka lærling.

 

- Tað, sum higartil hevur ligið í kortunum, er at áseta lærligakvotur, soleiðis at stovnar í ávísari stødd altíð skulu hava lærlingar, sigur Selma Ellingsgaard.

 

 

Starvsmannafelagið hevur í fleiri ár gjørt vart við trupulleikan, at tað ikki hava verið settir lærlingar.

 

- Skulu vit hava eitt samfelag við fjøltáttaðum útbúgvingarmøguleikum og eina væl virkandi fyrisiting, sum hevur starvsfólk við røttu førleikunum, er tað neyðugt at seta lærlingar.

 

Men hon leggur dent á, at eitt krav um at seta lærlingar, má undir ongum umstøðum raka starvsfólkahópin, sum longu er á stovninum, ella hava aðrar avleiðingar fyri stovnarnar.

 

- Almennu stovnarnir er ríkiliga hart sperdir sum er, og hóast tað er skilagott og neyðugt at  seta fleiri lærlingar, má tað ikki  vera steinur omaná byrðu, sigur forkvinnan í Starvsmannafelagnum.