Tveir bilførarar tiknir fyri rúsdrekkakoyring

Nógv hevur verið at gjørt í nátt og sambært vakthavandi á løgreglustøðini, hava so nógv fólk verið úti, at tað hevur verið sum á ólavsøku.

Nógv tiltøk vóru á skránni kring landið í gjár og tað hevur løgreglan merkt. Nógv hevur verið at gjørt í nátt og sambært vakthavandi á løgreglustøðini, hava so nógv fólk verið úti, at tað hevur verið sum á ólavsøku.

Tað merkir millum annað, at løgreglan hevur hjálpt einum rúgvu av fólkum heim, ið hava verið ávirkaði av rúsdrekka. Men løgreglan mátti eisini steðga tveimum persónum, ið vóru ávirkaðir av rúsdrekka, men kortini hildu, at teir kundu koyra bil.

Sambært vakthavandi bleiv tann fyrsti bilførarin steðgaðu í høvuðsstaðarøkinum um átta tíðina í gjárkvøldið, meðan tann seinni bleiv tikin í Klaksvík í nátt. Nú verður bíðað eftir úrslitinum av blóðroyndini hjá teimum báðum.

Í samband við høgtíðina hevur løgreglan eisini verið á vitjan á dansi- og skeinkistøðum kring landið fyri at tryggja, at halgidagslógin bleiv hildin. Í summum støðum varð neyðugt, at biða um at tónleikurin bleiv skrúvaður eitt sindur niður og bleiv tann áheitanin fylgd, upplýsir vakthavandi.