Twitter útilokar politiskar lýsingar

Framyvir verður tað ikki longur møguligt hjá politikarum, politiskum flokkum og øðrum við politiskum áhugamálum at lýsa á sosiala miðlinum Twitter.

Í kvøld boðar Twitter nevniliga frá, at tey frá næsta mánað av útiloka allar politiskar lýsingar á sínum miðlum. Tað skrivar Reuters tíðindastovan.

- Vit hava tikið avgerð um, at steðga allar politiskar lýsingar á Twitter um allan heim. Vit halda, at hvussu langt ein politiskur boðskapur ferðast er ikki nakað, ið skal keypast, men skal vinnast, skrivar Jack Dorsey, stjóri í Twitter, á sosiala miðlinum.

Sosialir miðlar sum Twitter, Facebook og Instagram hava seinastu árini verið fyri hørðum atfinningum, tí mett verður, at tey hava ein óhepnan leiklut og ávirkan á valúrslit, tá tey ikki gera meira fyri at steðga lýsingum við følskum og skeivum upplýsing.

Facebook hevur lovað batar, men hevur Twitter nú tikið eitt munandi meira víðgongt stig enn kappingarneytin.