Roykur men eingin eldur

Talan var tíbetur ikki um eld umborð á sluppini Westward Ho í morgun, so sum hildið.

 

Alarmsentralurin fekk fráboðan stutt eftir klokka 8 um, at fólk sóu royk koma úr Westward Ho, sum liggur við bryggju við Høgukai við Skeivapakkhús á Vestaruvág í Havn.

 

Politi og 10 sløkkiliðsmenn í fýra brandbilum komu skjótt á staðið – og teir kundu beinanvegin staðfesta, at eingin eldur var umborð á sluppuni. Talan var um falska fráboðan – og tó.

 

Tí tað er helst rætt, at fráboðarin hevði sæð royk umborð á Westward Ho, men roykurin er uttan iva komin úr skorsteininum frá oljufýrinum umborð á sluppini. Tann skorteinurin stendur so lágt, at hann kemur ikki upp um stokkin. Og sløkkiliðsmenninir kundu staðfesta, at skorsteinurin var heitur. Oljufýrurin tendrar og slóknar av sær sjálvum.

 

– Tá tað er so stilt og klárt í veðrinum, so koma ofta slíkar fráboðanir, tí roykurin sæst so væl, sigur Kartni Jacobsen, brandmeistari, sum var á staðnum.

 

Brandmeistarin og løgreglumenninir søgdu við ein munn, at betur er at boða frá eldi einaferð ov nógv enn einaferð ov lítið.