Neista-venjarin gevst

Kári Horn hevur fingið staðfest álvarsliga tarmsjúku, sum fyribils noyðir hann at leggja hondtbóltin á hillina

 

 

Kári Horn, sum í fjør stjórnaði Neista-kvinnum til FM-heitið, gevst sum venjari, tá Neistakvinnur sunnudagin spæla móti VÍF.

 

- Eg havi fingið boð um, at eg havi ein kroniska tarmsjúku, og fyrst og fremst ræður um at fáa tamarhald á hesum. Eg fekk boðini í farnu viku, og so skjótt sum dysturin seinasta vikuskifti var av, valdi eg at boða frá hesum. Samstundis játtaði eg, at eg skuldi hjálpa til, inn til nýggjur venjari var funnin, og tað rokni eg við er komið upp á pláss eftir dystin sunnudagin. At venja Neista-kvinnur átti í øllum førum at verið eitt venjarastarv, sum tað ikki er serliga trupult at manna, sigur Kári.

 

Gevst tú so fullkomuliga sum venjari, ella er talan um fyribils steðg?

 

- Vónandi er hetta bara fyribils. Boðini frá læknunum eru í øllum førum, at tá tamarhald er fingið á sjúkuni, kann eg liva eitt púra vanligt lív, men her og nú skal eg ansa mær eitt sindur. So vónandi kann eg aftur hugsa um hondbóltsvenjing, tá komandi kappingarár byrjar, sigur Kári, sum sjálvandi harmast støðuna, sum er íkomin.

 

- Hetta er jú ikki tað, sum eg hevði roknað við. Vit hava fleiri týðandi dystir fyri framman, og tí er timingin avgjørt ikki serliga góð, men eg noyðist sjálvandi fyrst og fremst at lurta eftir tí, sum læknarnir siga, staðfestir Kári.