Atgongumerki á 150 krónur fáast við dyrnar. Tó bert 100 kr. fyri limir í Grót.
Tey ið eru 18 ár og yngri, og eru limir í Tónleikasamtakinum Grót, hava ókeypis atgongd.
Nimbus Tópus
Áhoyrarar kunnu gleða seg at hoyra Nimbus Tópus í Tøting, tey fara á pall leygarkvøldið 24. februar.
Bólkurin framførir nýtt tilfar.
Við frontdamuni Onnu Sofíu Skoradal og sjeikabólkinum, mannaður av Jákup Tórgarð, Oliver Stryhn Tollundgaard og Magnus Christensen, verða tit í tryggum hondum og garanteraði eina góða uppliving
Nimbus Tópus bleiv veruliga ein partur av tí føroyska tónleikapallinum undir Sement 2023, tá tey gjørdust nummar tvey í harðari kapping. Ein av dómarunum í kappingini helt fyri, at hetta var besta konsertin á Sement nakrantíð - og bólkurin er bara blivin skarpari síðani.
Bólkurin:
Vokal: Anna Sofía Skoradal
Keys/klaver: Jákup Tórgarð
Bass: Oliver Stryhn Tollundgaard
Trummir: Magnus Christensen
Ragnar Finsson
Eins og Nimbus Tópus og nógvir aðrir ungir føroyskir tónleikarar, gjørdi Ragnar Finsson vart við seg á tónleikakappingini Sement, har hann í 2016 vann kappingina, tá við bólkinum Bluesette.
Yvirskriftin ið stóð eftir var hendan; ”Fangandi, fullførdur og væl samanspældur tónleikur,” vóru nøkur av rósandi orðunum til tónleikabólkin Bluesette.
Ragnar var tó longu áðrenn, eitt væl kent navn sum tónleikari í Føroyum, frá fleiri ymiskum verkætlanum, bæði sum solistur og við ymiskum bólkum.
Tað eru tó longu 8 ár síðani, at Bluesette vunnu Sement, og síðani tá er nógv vatn runni í ánna, og hevur Ragnar ment og víðka seg nógv. Bæði við at nema sær tónleikaliga útbúgving í Svøríki og hann hevur luttikið í fleiri nýggjum tónleikaligum verkætlanum seinastu árini.
Ragnar Finsson verður at hoyra sum solistur í Tøting, hetta leygarkvøldið í februar.
