Í gjár varð tað staðfest, at KÍ er føroyameistari í 2021. Í gjár vrð tað eisini staðfest, at HB næsta summar fer at spæla í Europa. Um tað verður sum silvurvinnari ella bronsuvinnari er ikki greitt enn.
B36 er á fjórða plássi við 42 stigum fyri 25 dystir. NSÍ er á fimta plássi við 38 stigum fyri 24 dystir. Seinnapartin fær NSÍ vitjan av 07 Vestur. Um tað eydnast NSÍ at vinna fulla úrtøku, so verður munurin frá NSÍ og B36 eitt stig, og so fer tað av álvara at lukta av finalu um fjórða plássið í síðsta umfari, tá ið NSÍ fær vitjan av B36.
Í 26. umfari, sum verður um eina viku, fær B36 vitjan av Víkingi, og tá fer NSÍ til Fuglafjarðar.
Síðani NSÍ vann grannauppgerðina á Svangaskarði 1-0 ímóti B68, hava tríggir NSÍ spælarar verið upptiknir á landsliðum. Klæmint A. Olsen og Tróndur Jensen hava verið burturfrá felagsvenjingum í A-landsliðsørindum, og Pætur Turiðarson Skipanes hevur verið á U-21 landsliðnum.
Tað kann væl vera, at NSÍ miðverjan verður skipað heilt av nýggjum í dag. Oddur Á. Højgaard er leikbannaður, Jóhan Troest Davidsen er skaddur, og tað er ivasamt, um Jákup Jakobsen er nóg birgur at spæla.
07 Vestur hevur 25 stig og hevur so at siga tryggjað sær pláss í bestu deildni í 2022. Í dag er Zoran Vujovic tøkur aftur, eftir at hann leingi hevur verið skaddur. Álopsspælarin John Fagerström er leikbannaður, og Asbjørn Heðinsson er framvegis skaddur. Tað er ivasamt, um Teitur Olsen, Dánjal Pauli Lervig og Martin Tausen eru førir fyri at spæla.
Tá ið 07 Vestur í níggjunda umfari var í Runavík endaði tað 1-1. Í 15. Umfari vann NSÍ 4-2 í Sørvági.
NSÍ – 07 Vestur: Alex Troleis kl. 15.00
KÍ | 24 | 22 | 2 | 0 | 95 | 8 | 68 |
Víkingur | 24 | 17 | 5 | 2 | 55 | 22 | 56 |
HB | 24 | 16 | 4 | 4 | 78 | 21 | 52 |
B36 | 25 | 11 | 9 | 5 | 49 | 31 | 42 |
NSÍ | 24 | 11 | 5 | 8 | 45 | 36 | 38 |
07 Vestur | 24 | 7 | 4 | 13 | 31 | 66 | 25 |
EB/Streymur | 24 | 6 | 4 | 14 | 26 | 50 | 22 |
B68 | 25 | 5 | 4 | 16 | 26 | 65 | 19 |
ÍF | 24 | 4 | 4 | 16 | 22 | 60 | 16 |
TB | 24 | 0 | 3 | 21 | 15 | 83 | 3 |