Men so tykist ikki vera. Í øllum førum ikki í Tjóðveldi og Framsókn við, har vent er í holini, tá tað kemur til at seta tiltøk í verk ímóti Russlandi.
Tey vóru øll so braneggjað fyri valið. Tey funnust at táverandi løgmanni fyri at drála við at seta tiltøk í verk. Og tað gjørdi hann eisini. Hann drálaði so nógv, at sjálvt allir andstøðuflokkarnir komu til ta niðurstøðu, at nú gjørdist einki annað enn at gera ein nýggjan sáttmála við Russland.
– Men koma vit til valdið, so verður øðrvísi. So verður alt kannað út í æsir, allar avleiðingar, og tiltøk verða sett í verk soleiðis, at vinnan kortini klárar seg, hóast øll samvinna við krígsmaskinuna Russland steðgar.
Men her kemur einki burturúr. Landsstýrið hevur nú drálað longri enn undanfarna landsstýri. Tjóðveldi er langt síðani krakelerað, har eru sterkar kreftir, sum vilja samstarv við Russland, kríggj ella ikki kríggj. Tað hevur størri týdning at fáa russisk skip til bryggju í Føroyum. Vit gera jú ongan mun, vit revsa bara okkum sjálvi, siga tey.
Fólkaflokkurin og Sambandsflokkurin siga jú tað sama sum hesar kreftir í Tjóðveldi og Framsókn. Mangt bendir á, at tað bara er Javnaðarflokkurin, sum stendur fast við støðuna fyri valið. At eingin sáttmáli verður gjørdur við Russland, so leingi landið er í kríggi í Ukraina.
Í blaðnum í dag hevur bretski ambassadørurin í Keypmannahavn eina »ógvuliga diplomatiska« áheitan á Føroyar. Hon vísir á, at Bretland hevur bannað øllum russiskum skipum at koma í bretskar havnir og ikki loyva russiskum skipum at fiska í bretskum sjógvi. Hon sigur, at hon blandar seg ikki í føroysku avgerðina um samstarv við Russland, men ger púra greitt, at bretar vilja ikki hava, at Føroyar loyva russiskum skipum at fiska í felagsøkinum millum Bretland og Føroyar, soleiðis sum vit gera í løtuni.
Tað er pínligt, um kommediuspælið sum var við fiskivinnunýskipanini og gongd í haga nú aftur skal gera seg galdandi um ein russlandspolitikk, ið partar av landsstýrinum ikki megna at taka støðu til.
Lovað er lovað. Tit eru vald upp á vallyfti, sum millum annað var at kvetta samstarvið við Russland. Nú má løgmaður skjótt traðka í karakter.