Í løtuni er bara eitt isfiskalínuskip til fiskiskap. Skipið kemur væntandi inn at landa síðst í hesi vikuni.
- Helst fara onkur ísfiskalínuskip avstað, nú bæði veður streymur eru til vildar, siga tey á Fiskamarknaði Føroya.
Meðan bara eitt ísfiskalínuskip er til fiskiskap, eru fleiri frystilínuskip úti, og tey flestu eru undir Føroyum í løtuni.
Eitt frystiskip fiskar í grønlendskum sjógvi, og eitt siglir heim undan Gønlandi.
- Eitt er á Føroyabanka, tvey á Íslandsrygginum, og fimm frystilínuskip fiska á landgrunninum.
Sagt verður, at línuskipini fáa mest av toski, longu, brosmu og so nakað av hýsu, blálongu og svartkalva.
- Streymurin er góður, og veðrið verður eisini gott, serliga fyrst í hesi vikuni. Tí rokna vit við nógvum útróðri.
Lagt verður aftrat, at útróðrarbátarnir fáa mest av hýsu, men í seinastuni hevur verið heldur meira at fingið av toski.
- Fiskiskapurin hjá útróðrarbátunum er brúkiligur, siga tey á Fiskamarknaði Føroya.
