Smittustøðan í landinum ger, at alsamt fleiri fólk hava tørv á at verða potaði, og trýstið á kanningarstøðini í Havn og í Klaksvík er so mikið stórt, at trupult er at fáa tíð til kanning.
- Hetta hevur stóra ávirkan á fleiri familjur, arbeiðspláss, skúlar og stovnar í Sundalagnum, verður sagt í økinum.
Tí hevur borgarstjórin í Sunda kommunu, Jógvan Kruse, heitt á Landssjúkrahúsið um at geva kommununi loyvi at skipa eina potistøð í Sundalagnum í eitt tíðarskeið.
Landssjúkrahúsið hevur játtað umbønini og fer Sunda kommuna saman við Eiðis kommunu nú at skipa fyri poting í Eydnuni á Oyrarbakka hvønn týsdag og hósdag - fyribils í tríggjar vikur.
Byrjað verður at pota týsdagin hin 25. januar.
- Kommununar skipa kanningartoymið og taka sær at tí praktiska, meðan Landssjúkrahúsið letur kanningarútgerð og greinar royndirnar. Kanningarnar eru ókeypis, men neyðugt er at bíleggja tíð á www.korona.fo. Latið verður upp fyri bíleggingum so skjótt, sum tað tøkniliga er klárt.
Í Sunda kommunu leggja tey aftrat, at tilboðið serliga er ætlað borgarum í Sunda kommunu og Eiðis kommunu.